Sam Rainsy (L) and Kem Sokha (R)The Phnom Penh Post
មាស សុខជា
ភ្នំពេញៈ ប្រធានគណបក្សសម រង្ស៊ី ដែលជាគណបក្សប្រឆាំងបានបដិសេធមិនជួបប្រជុំជាមួយនឹងលោក កឹម សុខាប្រធានគណបក្សសិទិ្ធមនុស្ស ដើម្បីពិភាក្សាពីការរួបរួមគ្នារវាងគណបក្សទាំងពីរនោះទេ ដោយលោកបានបញ្ជាក់ថា លោក កឹម សុខា ពុំមានស្មារតីរួបរួមគ្នា។
ថ្លែងតាមទូរស័ព្ទពីប្រទេសបារាំង កាលពីថ្ងៃម្សិលមិញ លោក សម រង្ស៊ី ប្រធានគណបក្សសម រង្ស៊ី បានឲ្យដឹងថា កិច្ចប្រជុំរវាងក្រុមការងារគណបក្ស សម រង្ស៊ី និងគណបក្សសិទិ្ធមនុស្ស ដើម្បីរករូបមន្តបង្រួបបង្រួមគ្នាអស់ជាច្រើនខែកន្លងមកនេះ គឺជាកិច្ចប្រជុំគ្មានប្រយោជន៍ ព្រោះលោក កឹម សុខា ពុំស្មោះត្រង់ ហើយមិនគោរពស្មារតីរួបរួមគ្នា ដូច្នេះជំនួប រវាងប្រធានគណបក្សសមរង្ស៊ី និងប្រធានគណបក្សសិទិ្ធមនុស្ស ពុំចាំបាច់ទេ។
លោក សម រង្ស៊ី បានបញ្ជាក់ថា៖ «កិច្ចប្រជុំមិនសំខាន់ទេ សំខាន់គឺស្មារតី។ យើងជួបប្រជុំ តើយើងពិភាក្សាអ្វីទៅ ប្រសិនបើយើងគ្មានស្មារតី?»។
លោក សម រង្ស៊ី បានអះអាងថា ក្នុងអំឡុងកិច្ចប្រជុំរវាងក្រុមការងារគណបក្សទាំងពីរអស់ជា ច្រើនខែ ក្រុមការងារគណបក្ស សិទិ្ធមនុស្សបានបង្ហាញពីភាពមិនស្មោះត្រង់។ លោកលើកឡើង ថា គណបក្សសិទិ្ធមនុស្សមិនគោរពអ្វីដែលខ្លួននិយាយនោះទេ។
លោក សម រង្ស៊ី បានបន្ថែមថា៖ «ផ្អែកលើរបាយការណ៍ដែលក្រុមការងារប្រាប់ខ្ញុំ គណបក្សសិទិ្ធមនុស្ស គ្មានស្មារតីបង្រួបបង្រួមគ្នាទេ។ នៅទល់មុខពួកគេនិយាយផ្សេង នៅក្រោយខ្នងពួកគេធ្វើផ្សឹង ដូច្នេះគេគ្មានស្មារតី វាមិនស្មោះត្រង់។ ហេតុនេះប្រសិនបើយើងខ្វះភាពស្មោះត្រង់ តើយើងនិយាយពីអ្វីទៅ វាគ្មានប្រយោជន៍អ្វីទេ?» ។
ប៉ុន្តែ លោក កឹម សុខា បានថ្លែងថា ការបដិសេធរបស់សមរង្ស៊ីបែបនេះ មិនមែនជាលើកទី១ទេ សម្រាប់លោកនោះ ដោយលោកបានបញ្ជាក់ថា មូលហេតុដែលលោក សម រង្ស៊ី បដិសេធកិច្ចប្រជុំ ព្រោះលោកមិនហ៊ានបង្រួបបង្រួមជាមួយនឹងអ្នកប្រជាធិបតេយ្យ លោកខ្លាចបាត់បង់សិទិ្ធអំណាចដាច់មុខ ក្នុងគណបក្សរបស់លោក។
លោក កឹម សុខា បានបញ្ជាក់ថា៖ «គាត់មិនហ៊ានបង្រួបបង្រួមជាមួយនឹងអ្នកប្រជាធិបតេយ្យពិត ពីព្រោះថា គាត់ចង់ប្រមូលផ្តុំអំណាច។ នៅពេលគាត់បង្រួបបង្រួមជាមួយគណបក្សខ្ញុំ គាត់មិនអាចប្រើអំណាចដាច់មុខតែឯង។ ដូច្នេះ វាស្រេចលើគាត់ប្រជាជននឹងមើលឃើញ អ្នកណាដែលចងបង្រួបបង្រួម អ្នកណាដែលមិនចង់បង្រួបបង្រួម»។
លោក កឹម សុខា បានអះអាងថា លោកមិនដែលខ្វះភាពស្មោះត្រង់ទេ ផ្ទុយទៅវិញលោក សម រង្ស៊ី ទៅវិញទេ ដែលមិនស្មោះត្រង់ជាមួយលោក។ លោកលើកឡើងថាលោកសម រង្ស៊ី មិនស្មោះត្រង់ជាមួយលោកជាច្រើនដងរួចមកហើយ។ លោកបញ្ជាក់ជាថ្មីម្តងទៀតថា លោក សម រង្ស៊ី បានក្បត់ពាក្យសន្យា កាលពីឆ្នាំ២០០៨ ដោយចូលរួមក្នុងកិច្ចប្រជុំរដ្ឋសភាបន្ទាប់ពីគណបក្សសម រង្ស៊ី និងគណបក្សសិទិ្ធមនុស្សសន្យាគ្នាថា មិនចូលរួមកិច្ចប្រជុំរដ្ឋសភាពេលនោះ។
លោក កឹម សុខា បានបន្តថា៖ «ខ្ញុំស្មោះត្រង់នឹងលទិ្ធប្រជាធិបតេយ្យ ស្មោះត្រង់នឹងប្រជាជន។ ខ្ញុំមិនស្មោះត្រង់នឹងបុគ្គលដាច់ខាតនោះទេ។ ក្រុមរបស់ខ្ញុំមិនមានទំនុកចិត្តលើគាត់ទេ ប៉ុន្តែ វាជាបញ្ហាជាតិ ហើយជាឆន្ទៈប្រជាជន ដូច្នេះ ខ្ញុំព្យាយាមប្រមូល ព្រោះខ្ញុំយល់ថា គាត់មិនមែនជាអ្នកបំផ្លាញជាតិទេ?»៕ TK
No comments:
Post a Comment