Posted by សុភ័ក្ត្រ on http://sopheak.wordpress.com/2011/03/22/hang-meas/
ស្រុកខ្មែរយើងអារឿងម្ចាស់ក្រុមហ៊ុនផលិតចម្រៀងកុបពីបកប្រែ ចម្រៀងបរទេសមកឲ្យខ្មែរច្រៀងតាមនោះ យើងឈប់និយាយទៅ ដ្បិតវាបានក្លាយជាជំងឺមហារីកសង្គម និងបានក្លាយទៅជាវប្បធម៌មួយទៅហើយរបស់ខ្មែរម្ចាស់ផលិតកម្មនានា បូករួមនឹងកំហុសខ្មែរដែលនាំគ្នាគាទ្រនោះផង។
អ្វីដែលហួសចិត្តសម្រាប់ខ្ញុំនឹងបរិយាយនៅពេលនេះ គឺថាបន្ទាប់ពីដេកកុបពី ដើរកុបពី អង្គុយកុបពី ឈរកុបពី ចម្រៀងគេគ្រប់ជាតិ គ្រប់សាសន៍មកច្រៀងមក ដល់យូរៗទៅអស់បទកុបពី ស្រាប់តែពេលនេះផលិតកម្មដែលគេហៅថាទី១ក្នុងស្រុកខ្មែរ គឺហង្សមាស នោះឥឡូវស្រាប់តែយកបទដែលជាបទចម្រៀងប្រចាំ និងលើកតម្កើងប្រទេសថៃមកឲ្យខ្មែរច្រៀងតាមទៀត។ ហួសចិត្តរកនិយាយអ្វីមិនត្រូវទេ។
បទ «สยามเมืองยิ้ม» ឬប្រែជាខ្មែរថា «ស្យាមស្រុកញញឹម» (ឬដែលគេដឹងជាទូទៅ និងជាយុទ្ធនាការរបស់ប្រទេសថៃថា Thailand, Land of Smiles នោះឯង) ដែលច្រៀងដោយអតីតរាជនីចម្រៀងថៃ នាង ផុំផួង ដួងច័ន្ទ្រ (ថៃ៖ พุ่มพวง ดวงจันทร์) គឺជាបទមួយដែលប្រទេសថៃគេបានផលិតឡើងដើម្បីលើកតម្កើងស្រុកគេ វាប្រៀបបាននឹងបទ «ពង្សាវតារខ្មែរ» របស់ខ្មែរយើងដូច្នោះដែរ។ ស្រុកថៃគ្រាន់តែចេញភ្លេងនៃបទនេះមកគេស្គាល់ និងស្ដាប់ឡើងនាំគ្នាសឹងបះរោម ព្រោះតែគេមានមោទនភាពនឹងជាតិគេ។ មិនដឹងហេតុផលអ្វីទាល់តែសោះ ដែលហង្សមាសសុខៗទៅយកបទបែបជាតិនិយមរបស់ថៃមកកុបពី ធ្វើបទចម្រៀងឲ្យខ្មែរស្ដាប់ និងច្រៀងតាមនោះឡើយ។ នេះឯងឬស្នាដៃកូនខ្មែរសម័យនេះ? sic បើយកទំនុកបទភ្លេង សាកល វាមិនសូវជាបញ្ហាអ្វីទេ តែនេះហង្សមាសឈានទៅកុបពីបទចម្រៀងបែបនេះ បន្តិចទៀតច្បាស់ជាអស់បទចម្រៀងចម្លង ហង្សមាសមុខជានឹងចម្លងភ្លេងជាតិថៃ មកឲ្យកូនខ្មែរច្រៀងតាមលាន់ហើយមើលទៅ ខ្ញុំថា។
បទចម្រៀងដែលក្រុមហ៊ុនហង្សមាសបានកុបពីពីបទ «ស្យាមស្រុកញញឹម» គឺស្ថិតនៅក្នុងថាសចម្រៀងលេខ៤៣១ (ឈុតអនុស្សាវរីយ៍សំពៅលូន) ឈ្មោះ «មរតកជីវិត» ដែលច្រៀងដោយ នាង ខាត់ សុឃីម។ បើទោះបីជាខំធ្វើភ្លេងឲ្យស្ដាប់ទៅដូចខ្មែរ តែវាមិនទៅរួចទេ ព្រោះសាច់ភ្លេងមានជាប់ក្លិនថៃយ៉ាងច្បាស់ ដ្បិតអ្វីវាជារបស់គេសុទ្ធសាធ។ ស្ដាប់ទៅគួរឲ្យអាណិតខ្មែរ អាណិតដូនតាខ្មែរដែលខំសាងប្រទេសពីអតីតរុងរឿង សម័យនេះកូនខ្មែរបានតែខំកុបពីបទភ្លេងគេ មកឲ្យជនជាតិគេមើលងាយខ្មែរកាន់តែខ្លាំងឡើងៗពីមួយថ្ងៃទៅមួយ ថ្ងៃ។
ខាងក្រោមនៃជាអត្ថន័យប្រែនៃបទ «สยามเมืองยิ้ม»
ចូរអ្នកទាំងអស់គ្នាមានមោទនភាពចុះដែលបានកើតជាជនជាតិថៃ
យើងមិនដែលបានក្លាយជាទាសករនៃជាតិណា (មិនដែលស្ថិតក្រោមអាណានិគម) ហើយយើងមានទឹកចិត្តដ៏ល្អផូរផង់
ទូទាំងពិភពលោកបានផ្ដល់នាមប្រទេសយើងថា ជាស្យាមស្រុកញញឹម
យើងគួរមានមោទនភាពចំពោះភាពល្អស្អាតនៃប្រទេសយើង។ជនជាតិដែលមានចិត្តត្រជាក់ គឺជាជនជាតិថៃយើងនេះ
បើទោះបីមានជនជាតិផ្សេងទៀតមកពំនាក់ យើងមិនដែលហាមឃាត់
អ្នកខ្លះឆ្លងខេត្តឆ្លងស្រុកមកចូលពឹងបុណ្យស្យាមប្រទេស (ថៃ)
ពួកយើងនៅតែញញឹមទទួលអ្នក។ស្រុកយើងល្បីថាជាប្រទេសដែលមានទឹកចិត្ត
ហើយសូមផ្ដាំទៅអ្នកមកស្នាក់អាស្រ័យថាកុំធ្វើអ្វីឲ្យប៉ះពាល់ដល់ប្រទេសថៃ
ជនជាតិថៃគឺជាជនជាតិស្មោះត្រង់មកតាំងពីបុរាណកាល
ត្រឹមបាយមួយចាន បើអ្នកណាភ្លេចរបស់អ្នកនោះគឺនិរគុណ។ជនជាតិថៃស្រឡាញ់ជាតិ និងសាសនា
ព្រមទាំងអង្គព្រះមហាក្ស័ត្រិយ៍ ដែលជាទីសក្ការៈ
ប្រសិនបើអ្នកគោរពសិទ្ធិរបស់ថៃ អ្នកអាចរស់នៅបានយូរ
ប្រទេសថៃមានចិត្តបុណ្យ នៅញញឹមដាក់អ្នកជានិច្ច៕
បទភ្លេងមេឡូឌី ដែលមានអត្ថន័យជាភ្លេងជាតិនិយមរបស់ប្រទេសថៃបែបនេះ អ្នកគិតថា ខ្មែរយើងយកមកធ្វើជាចម្រៀងខ្មែរឲ្យជនជាតិយើងច្រៀងតាមដែរឬ យ៉ាងណា?
សូមស្ដាប់ចម្រៀងនេះ និងបទចម្លងរបស់ហង្សមាស ខាងក្រោម៖
No comments:
Post a Comment