ដោយ សុខ សេរី
RFA
នៅថ្ងៃទី ១០ ខែកុម្ភៈ ឆ្នាំ ២០១២ ទីស្ដីការគណៈរដ្ឋមន្ត្រី បានឆ្លងឯកសារយុទ្ធសាស្ត្រសំខាន់មួយ ដើម្បីបើកផ្លូវឲ្យមានការត្រួតពិនិត្យលើបំណុលសាធារណៈនៃប្រទេស កម្ពុជា សម្រាប់ឆ្នាំ ២០១១ ដល់ឆ្នាំ ២០១៨។
រដ្ឋាភិបាលកម្ពុជាដឹកនាំដោយ លោកនាយករដ្ឋមន្ត្រី ហ៊ុន សែន កំពុងតែរៀបចំយុទ្ធសាស្ត្រដ៏សំខាន់មួយ ដើម្បីទប់ស្កាត់មិនឲ្យកម្ពុជា ធ្លាក់ចូលក្នុងវិបត្តិធ្ងន់ធ្ងរ គឺជំពាក់បំណុលគេវ័ណ្ឌក ដូចប្រទេសមួយចំនួននៅតំបន់អឺរ៉ុប (Euro-Zone)។
សេចក្ដីប្រកាសព័ត៌មានរបស់ទីស្ដីការគណៈរដ្ឋមន្ត្រី ចេញផ្សាយនៅថ្ងៃទី ១០ ខែកុម្ភៈ ឆ្នាំ ២០១២ បានបញ្ជាក់អំពីវិធានការសំខាន់ៗ ដូចតទៅ៖ ទី១ ត្រូវខ្ចីឥណទានក្នុងទំហំសមស្រប ដែលស្ថានភាពថវិកា និងសេដ្ឋកិច្ចកម្ពុជាអាចទ្រាំទ្របាន។ ទី២ ត្រូវខ្ចីតែឥណទាន ដែលមានកម្រិតសម្បទានខ្ពស់។ ទី៣ ត្រូវខ្ចីឥណទានសម្រាប់តែវិស័យអាទិភាព ដើម្បីទ្រទ្រង់កំណើន និងបង្កើតផលិតភាពសេដ្ឋកិច្ច។ និងទី ៤ ត្រូវប្រើប្រាស់ឥណទានទាំងនោះ ប្រកបដោយតម្លាភាព និងប្រសិទ្ធភាពបំផុត។
លោកនាយករដ្ឋមន្ត្រី ហ៊ុន សែន កន្លងមក ធ្លាប់បានបញ្ជាក់ថា លោកមិនបណ្ដែតបណ្ដោយឲ្យកម្ពុជា ធ្លាក់ចូលក្នុងវិបត្តិធ្ងន់ធ្ងរនៃការជំពាក់បំណុលគេវ័ណ្ឌកនោះ ទេ។
ទាក់ទងនឹងវិធានការនេះ តំណាងរាស្ត្រគណបក្ស សម រង្ស៊ី លោក សុន ឆ័យ មានប្រសាសន៍ថា វិធានការបែបនេះ រដ្ឋាភិបាលគួរតែមានយូរមកហើយ ដោយលោកបានចាត់ទុកថា ហាក់ដូចជាយឺតបន្តិច។
លោក សុន ឆ័យ៖ «សម្រាប់ការខ្ចីបុលបរទេស ទៅថ្ងៃមុខនេះ ចាំបាច់ត្រូវតែមានការព្រមព្រៀងពីរដ្ឋសភា លើគម្រោងនីមួយៗ។ មិនត្រូវការការខ្ចីបុលជាកញ្ចប់ ដែលត្រូវយកទៅបែងចែកហើយ បានរាយការណ៍ឲ្យសភាជាក្រោយនោះទេ។ ការឲ្យសភាពិនិត្យលើគម្រោងនីមួយៗ ជាមុន គឺជាគោលការណ៍ច្បាប់ ដែលយើងធ្លាប់មានពីមុនមក ហើយការធ្វើបែបនេះ និងនាំឲ្យមានការចូលរួម ពីសមាជិកសភាធានាថា ការខ្ចីបុលពីបរទេស និងស្ថាប័នអន្តរជាតិហ្នឹង មិនចាយវាយខ្ជីខ្ជា រនោះទេបាទ»។
លោកនាយករដ្ឋមន្ត្រី ហ៊ុន សែន កាលពីថ្ងៃទី ២៣ ខែមិថុនា ឆ្នាំ ២០១១ កន្លងទៅនេះ បានសម្រេចឲ្យអនុវត្តន៍អនុក្រឹត្យលេខ ១៣១ ស្ដីពីការគ្រប់គ្រងបំណុលសាធារណៈ។
ចំណែកឯកសារយុទ្ធសាស្ត្រ ដែលបានឆ្លងនៅថ្ងៃទី ១០ ខែកុម្ភៈនេះ ស្ដីពីការគ្រប់គ្រងបំណុល សាធារណៈ ឆ្នាំ ២០១១ ដល់ ឆ្នាំ ២០១៨នោះ គឺត្រូវបានរៀបចំដោយក្រសួងសេដ្ឋកិច្ច និងហិរញ្ញវត្ថុ ដែលមានគោលដៅកៀរគរទុនហិរញ្ញវត្ថុ សម្រាប់ការអភិវឌ្ឍន៍ប្រទេសកម្ពុជា។
កាលពីថ្ងៃទី១ ខែកុម្ភៈ ឆ្នាំ ២០១២ ប្រធានធនាគាររដ្ឋចិន លោក លី រ៉ូហ្គូ (Li Ruogu) បានយល់ព្រមឲ្យប្រទេសកម្ពុជាខ្ចីឥណទានការប្រាក់ទាប ចំនួនជាង ៥០០ លានដុល្លារអាមេរិកទៀត តាមសំណើរបស់លោកនាយករដ្ឋមន្ត្រី ហ៊ុន សែន ដើម្បីយកមកចំណាយលើគម្រោងអភិវឌ្ឍន៍ចំនួន ៧ រាប់ទាំងការសាងសង់កំណាត់ផ្លូវជាតិលេខ ៦ ឆ្ពោះទៅខេត្តសៀមរាបជាផ្លូវសេដ្ឋកិច្ច និងទេសចរណ៍។
លោក សុន ឆ័យ បានឲ្យដឹងថា រហូតមកដល់ពេលនេះ ប្រទេសកម្ពុជា បានជំពាក់បំណុលប្រទេសចិនចំនួនជាង ៣.០០០ លានដុល្លារអាមេរិក និងជំពាក់បំណុលប្រទេសមួយចំនួនទៀត សរុបទាំងអស់ជាង ៦.៥០០ លានដុល្លារអាមេរិក៕
កំណត់ចំណាំ៖ ចំពោះ អ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃតែប៉ុណ្ណោះ។
No comments:
Post a Comment