 |
| លោក សម រង្ស៊ី ក្នុងសន្និសីទកាសែត តាមវីដេអូខន់ហ្វឺរេន ពីប្រទេសបារាំងម្សិលមិញ។ រូបថត RFI |
Thursday, 17 November 2011
មាស សុខជា
The Phnom Penh Post
យោងទៅតាមច្បាប់ គណបក្សប្រជាជន មិនអាចយកអាសនៈគណបក្ស សម រង្ស៊ី បែងចែកបានទេ ប្រសិនបើគណបក្សប្រឆាំងនេះ ពុំរំលាយខ្លួនឯង ឬសុខចិត្តផ្តល់អាសនៈរបស់ពួកគេ ទៅឲ្យគណបក្សណាមួយនោះ ហើយថា បើសភាបើកសម័យប្រជុំ វាប៉ះពាល់ដល់ច្បាប់រដ្ឋធម្មនុញ្ញ ដែលតម្រូវឲ្យសភាមានសមាជិក ១២០ រូបដើម្បីបើកសម័យប្រជុំ – គល់ បញ្ញា នាយកប្រតិបត្តិអង្គការឃ្លាំមើលការបោះឆ្នោតខុម ហ្វ្រែល
According to the law, the CPP cannot divide the SRP seats if the SRP does not dissolve itself up or if the SRP does not agree to give up its seats to another political party, and National Assembly meetings will affect the constitution which requires that the National Assembly has a quorum of 120 – Koul Panha, Comfrel executive director
ភ្នំពេញៈ គណបក្សសម រង្ស៊ី បានប្រកាសនៅក្នុងសន្និសីទកាសែតមួយកាលពីម្សិលមិញថា តំណាងរាស្ត្ររបស់ខ្លួន នឹងធ្វើការលាលែងពីរដ្ឋសភាជាក្រុម ជាអ្វីដែលគណបក្សប្រឆាំងមួយនេះ អធិប្បាយថា ដើម្បីបង្ហាញពីការមិនពេញចិត្តចំពោះគណបក្សប្រជាជនកម្ពុជា ដែលមិនដែលអើពើទៅនឹងសិទ្ធ និងតែងតែរុកកួន ទៅលើគណបក្ស ដែលមានសំឡេងភាគតិច។
ក្នុងសេចក្តីថ្លែងការណ៍មួយ ដែលត្រូវបានចែកចាយ នៅក្នុងសន្និសីទកាសែត កាលពីម្សិលមិញ លោក សម រង្ស៊ី បានថ្លែងថា គណបក្សប្រជាជន កំពុងដឹកនាំប្រទេសដោយមិនអើពើទៅនឹងសិទ្ធិរបស់គណបក្សសំឡេងភាគ តិច ហើយរដ្ឋសភាគ្រាន់តែជាសភាឡប់ឡែប៉ុណ្ណោះ ខណៈប្រព័ន្ធតុលាការ ជាឧបករណ៍នយោបាយ ដើម្បីរក្សា និងពង្រឹងអំណាចរបស់មេដឹកនាំផ្តាច់ការ។ សេចក្តីថ្លែងការណ៍បន្តថា៖«ការរំលោភបំពានសិទ្ធិមនុស្សមិនអាច ទទួលយកបាន និងការរំលោភផ្សេងៗទៀតរបស់រដ្ឋាភិបាល ត្រូវតែបញ្ឈប់»។
លោក សម រង្ស៊ី បានព្រមានថា លទ្ធផលទាន់ហន់នឹងកើតឡើង ចំពោះរដ្ឋាភិបាល ប្រសិនបើមិនបំពេញទៅតាមការទាមទាររបស់គណបក្សប្រឆាំង ដោយអះអាងថា សេចក្តីព្រាងច្បាប់ថវិកាសម្រាប់ឆ្នាំ ២០១២ នឹងមិនអាចត្រូវបានអនុម័តឡើយ ហើយកិច្ចព្រមព្រៀងខ្ចីប្រាក់ ដែលរដ្ឋាភិបាលបានចុះហត្ថលេខាថ្មីៗនេះជាមួយបរទេស និងស្ថាប័នហិរញ្ញវត្ថុអន្តរជាតិនានា ក៏នឹងមិនអាចទទួលបានការផ្តល់សច្ចាប័ន តាមរដ្ឋធម្មនុញ្ញដែរ។ គណបក្ស ប្រឆាំង បានសច្ចាថា ខ្លួននឹងបន្តរារាំងការបោះឆ្នោត ឬការសម្រេចណាមួយរបស់រដ្ឋសភា រហូតដល់រដ្ឋាភិបាល យល់ព្រមផ្អាកការទន្ទ្រានកាន់កាប់ដីធ្លី និងបណ្តេញប្រជាពលរដ្ឋចេញទាំងបង្ខំដែលស្របទៅតាមការអំពាវនាវកាល ពីពេលថ្មីៗនេះ ពីអង្គការសហប្រជាជាតិ និងរហូតដល់គណបក្សប្រជាជន ផ្លាស់ប្តូរសមាសភាពថ្នាក់ដឹកនាំគណៈកម្មាធិការជាតិរៀបចំការ បោះឆ្នោត ទៅតាមអនុសាសន៍របស់សហគមន៍អឺរ៉ុប។ លោក សម រង្ស៊ី បានគូសបញ្ជាក់ថា៖ «លួចដីយើង គឺលួចជីវិតយើង។ លួចសន្លឹកឆ្នោតយើង គឺលួចជីវិតយើង និងអនាគតយើង»។
តាមរយៈវីឌីអូខន់ហ្វឺរិនពីប្រទេសបារាំង លោក សម រង្ស៊ី បានថ្លែងដោយលើកជាឧទាហរណ៍ថា រថយន្តមួយគ្រឿងដែលផលិតចេញពីរោងចក្រ ត្រូវតែមានកង់ ៤ បើមិនអ៊ីចឹងទេ រថយន្តនោះ មិនអាចបើកបរទៅមុខបានទេ ហើយដូច្នេះរដ្ឋសភាគឺដូចគ្នា ក្រោយស្ថាប័ននេះត្រូវបានបង្កើត ស្ថាប័ននេះ ត្រូវតែមានសមាជិកសភាយ៉ាងតិច ១២០ រូប ដើម្បីសម្រេចលើច្បាប់អ្វីមួយ។
លោក សម រង្ស៊ី បានបន្តថា៖«គណបក្ស សម រង្ស៊ី ពុំបណ្តោយឲ្យសភាឡប់ឡែធ្វើបែបនេះតទៅទៀតទេ។ បើយើងចូលរួមបោះឆ្នោតដូចនេះ វាដូចយើងចូលរួមបំផ្លាញជាតិអញ្ចឹង»។
យ៉ាងណាក្តី លោក ជាម យៀប សមាជិកសភាគណបក្សប្រជាជនកម្ពុជាបានចាត់ទុកការចោទប្រកាន់របស់លោក សម រង្ស៊ី ថា គ្រាន់តែជាភាពទាល់ច្រកនយោបាយ និងការរវើរវាយប៉ុណ្ណោះ ហើយថា គណបក្សកាន់អំណាច ពុំខ្លាចការលើកឡើងរបស់គណបក្សប្រឆាំងឡើយ ដោយអះអាងថា ទោះបីគណបក្ស សម រង្ស៊ី ពហិការ ឬលាលែង គណបក្សប្រជាជននៅតែទៅមុខជាមួយសម័យប្រជុំសភា។ លោកបន្តថា៖«បើសមាជិកគណបក្សប្រឆាំង លោកធ្វើតាមគាត់ ពួកគេង៉េងង៉ាងដូចគ្នាអ៊ីចឹង»។ លោកបន្ថែមថា បើសមាជិកសភាគណបក្សប្រឆាំងនេះលាលែង អាសនៈគណបក្សប្រឆាំងនេះទាំងអស់ នឹងត្រូវបែងចែកទៅឲ្យគណបក្សដទៃ ដែលមានអាសនៈក្នុងសភា ដើម្បីបំពេញអាសនៈ ១២៣ ក្នុងសភា។
ប៉ុន្តែ លោក គល់ បញ្ញា នាយកប្រតិបត្តិអង្គការឃ្លាំមើលការបោះឆ្នោតខុម ហ្វ្រែល បានថ្លែងថា យោងទៅតាមច្បាប់ គណបក្សប្រជាជន មិនអាចយកអាសនៈគណបក្ស សម រង្ស៊ី បែងចែកបានទេ ប្រសិនបើគណបក្សប្រឆាំងនេះ ពុំរំលាយខ្លួនឯង ឬសុខចិត្តផ្តល់អាសនៈរបស់ពួកគេ ទៅឲ្យគណបក្សណាមួយនោះ ហើយថា បើសភាបើកសម័យប្រជុំ វាប៉ះពាល់ដល់ច្បាប់រដ្ឋធម្មនុញ្ញ ដែលតម្រូវឲ្យសភាមានសមាជិក ១២០ រូបដើម្បីបើកសម័យប្រជុំ៕
No comments:
Post a Comment