 |
| អ្នកភូមិបឹងកក់ដែលរងការរំលោភបំពាន យកម្ជុលចាក់ដៃច្របាច់យកឈាមសរសេរបដាតវ៉ា។ រូបថត ម៉េង គីមឡុង – Boeung Kak Lake residents cut their finger to draw blood for writing their protest messages. |
 |
| Boeung Kak Lake residents with their bloody protest message (Photo: The Phnom Penh Post) |
Friday, 02 December 2011
ឃុត សុភចរិយា
The Phnom Penh Post Khmer
ភ្នំពេញៈ ក្រុមអ្នកភូមិបឹងកក់ជាង ១០០ នាក់ កាលពីព្រឹកម្សិលមិញ បាននាំគ្នាអារដៃយកឈាមមកសរសេរជាពាក្យតវ៉ាបង្ហោះទៅលើមេឃ ទុកជាសារក្នុងន័យប្រឆាំងទៅនឹងការចោទប្រកាន់របស់តុលាការ រាជធានីភ្នំពេញដែលបានចោទប្រកាន់តំណាងអ្នកភូមិពីបទជេរប្រមាថ និងប្រឆាំងបទបញ្ជាមន្ត្រីសាធារណៈ។
ស្នាមឈាមដែលក្រុមអ្នកភូមិទាំងនេះបានបង្ហោះទៅ ក្នុងលំហអាកាស តាមរយៈប៉េងប៉ោង ដោយសរសេរមានន័យជាអាទិ៍ថា ៖ «អយុត្តិធម៌ណាស់ ជនរងគ្រោះក្លាយជាជនល្មើស។ ខ្ញុំការពារដីក្លាយជាអ្នកទោស…»។
ឈាមដែលពួកអ្នកបឹងកក់យកមកសរសេរជាសារទាំងនេះ បានមកពីអ្នកភូមិចំនួន ៥ នាក់ ដែលបានយកឡាម និងម្ជុលមកវះនិងចាក់ម្រាមដៃរបស់ខ្លួនរួចហើយសម្រក់ធ្វើ ជាទឹកខ្មៅ។
ម្នាក់ក្នុងចំណោមអ្នកទាំង៥នាក់ ដែលបានយកផ្លែឡាមវះម្រាមចង្អុលដៃរបស់ខ្លួន អ្នកស្រី ខែក ចាន់រស្មី អាយុ៣១ឆ្នាំ មកពីភូមិ ២១ សង្កាត់ស្រះចក ខណ្ឌដូនពេញ បានប្រាប់ភ្នំពេញប៉ុស្តិ៍ ថា ដោយសារពួកគាត់អស់មធ្យោបាយក្នុងការតស៊ូមតិទាមទារឲ្យអាជ្ញាធរ ផ្ដល់នូវដំណោះស្រាយចេញប្លង់កម្មសិទ្ធិ ដល់ប្រជាពលរដ្ឋមួយចំនួន ដែលត្រូវកាត់ចេញពីគម្រោងទទួលបានប្លង់កម្មសិទ្ធិលើដីទំហំ ១២,៤៤ហិកតា ដែលផ្ដល់ដោយលោកនាយករដ្ឋមន្ត្រី កាលពីខែសីហាកន្លងទៅ។
អ្នកស្រីថ្លែងថា ៖ « [សារនេះ]យើងចង់បង្ហាញសាធារណជនអំពីអារម្មណ៍ឈឺចាប់របស់ពួកយើងទាំងអស់គ្នា…» ។
អ្នកស្រីបានបន្តថា ចាប់តាំងពីក្រុមហ៊ុនស៊ូកាគូអ៊ីន បូមខ្សាច់លុបផ្ទៃបឹងកក់ដើម្បីអភិវឌ្ឍប្រែក្លាយតំបន់នេះឲ្យទៅជា ទីក្រុងរណបដ៏ប្រណីតថ្មីមួយទៀត ក្នុងរាជធានីភ្នំពេញមក ប្រជាពលរដ្ឋក្នុងតំបន់បឹងកក់ ដែលរួមទាំងគ្រួសាររបស់គាត់ផងដែរ បានជួបប្រទះរឿង«អយុត្តិធម៌» ជាច្រើន រួមមានការបូមខ្សាច់ពន្លិចនិងវាយកម្ទេចផ្ទះ រងការវាយបង្ក្រាបដោយភាពហិង្សាលើរូបរាងកាយពីសំណាក់កម្លាំង អាជ្ញាធរ ការចាប់ឃុំខ្លួន និងរហូតដល់មានការចោទប្រកាន់តាមប្រព័ន្ធតុលាការថែមទៀត។
ការប្រើមធ្យោបាយអារដៃឬចាក់ម្រាមដៃខ្លួនឯងរបស់ ប្រជាពលរដ្ឋ ទាំងនេះបានធ្វើឲ្យអង្គការសង្គមស៊ីវិលមួយចំនួនមានសេចក្ដី កង្វល់ជាខ្លាំង។
លោក សៀ ភារម្យ អគ្គលេខាធិការដ្ឋាននៃក្រុមការងារបេសកកម្មពិសេសសិទ្ធិលំនៅដ្ឋាន នៃកម្ពុជា បានថ្លែងថា បើយោង ទៅតាមស្ថានភាពខាងលើ បង្ហាញថា អ្នកភូមិទាំងនេះកំពុង មានបញ្ហាលើសុខភាពខាងផ្លូវ ចិត្តយ៉ាងធ្ងន់ និងគួរឲ្យបារម្ភបំផុត។
លោកបានបន្តថា ការនាំគ្នាអារឬចាក់ម្រាមដៃរបស់ខ្លួនឯងបែបនេះ គឺជាសញ្ញាមិនល្អមួយ និងប្រកបដោយការគ្រោះថ្នាក់ ហើយវាក៏ជាមធ្យោបាយ និងជាបញ្ហាថ្មីមួយទៀត ដែលកំពុងតែ កើតឡើង ចំពោះអ្នកភូមិបឹងកក់រងគ្រោះទាំងនេះ៕
No comments:
Post a Comment