 |
| សមត្ថកិច្ចវៀតណាម ឈរមើលគណបក្សប្រឆាំងទៅពិនិត្យបង្គោលព្រំដែនក្នុងស្រុក ពញាក្រែកកាលពីឆ្នាំ ២០១០។ រូបថត ហេង ជីវ័ន |
មាស សុខជា
The Phnom Penh Post
«គេ (វ៉ា គឹមហុង) ថា ភូមិរបស់ លោកហេង សំរិន ជាភូមិរបស់វៀតណាមយូរហើយ មិនអាចទេ…ខ្ញុំធ្លាប់ចុះទៅផ្ទាល់ជួបចាស់ទុំនៅទីនោះ គាត់ប្រាប់ខ្ញុំថា កាលពីអំឡុងឆ្នាំ ៦០ ដីខ្មែរទៅពីព្រំដែនបច្ចុប្បន្ន ៣-៤ គីឡូម៉ែត្រទៀត»
ភ្នំពេញៈ មន្រ្តីជាន់ខ្ពស់នៃគណៈកម្មាធិការកិច្ចការព្រំដែន បានថ្លែងថា កម្ពុជា
កំពុងត្រៀមរៀបចំភូមិចំនួនពីរ ក្នុងខេត្តកំពង់ចាម
ដើម្បីស្នើទៅវៀតណាមដោះដូរ ដើម្បីរក្សាភូមិ ២ ដែលគេស្គាល់ថា
ជាភូមិរបស់លោក ហេង សំរិន ប្រធានរដ្ឋសភា ដែលជាភូមិរបស់វៀតណាម។
លោក វ៉ា គឹមហុង ទេសរដ្ឋមន្រ្តី ទទួលបន្ទុកកិច្ចការព្រំដែន
របស់រដ្ឋាភិបាលកម្ពុជា បានថ្លែងថា ភូមិពីរ គឺភូមិថ្លុកត្រាច
និងអន្លង់ជ្រៃ ក្នុងស្រុកពញាក្រែក ខេត្តកំពង់ចាម ដែលគេស្គាល់ថា
ជាស្រុកកំណើតរបស់លោក ហេង សំរិន ប្រធានរដ្ឋសភានោះ
ជាអតីតភូមិរបស់វៀតណាម ដោយលោកអះអាងថា ភូមិទាំង ២
ត្រូវបានដាក់ចូលក្នុងទឹកដីវៀតណាម តាំងពីកម្ពុជា
ស្ថិតក្រោមអាណានិគមបារាំងមកម្ល៉េះ។ លោកបានអះអាងបន្តទៀតថា
វៀតណាម ប្រគល់ភូមិថ្លុកត្រាច និងអន្លង់ជ្រៃ មកឲ្យកម្ពុជា
តាំងពីអាណានិគមបារាំង ហើយថា
ក្នុងការដោះដូរភូមិរវាងប្រទេសទាំងពីរ
ប្រសិនបើកម្ពុជាចង់រក្សាភូមិទាំងនេះ
កម្ពុជាត្រូវរកភូមិផ្សេងទៀតដើម្បីប្រគល់ឲ្យវៀតណាមវិញ។ លោក វ៉ា
គឹមហុង បានប្រាប់ ភ្នំពេញ ប៉ុស្តិ៍ កាលពីម្សិលមិញថា៖
«យើងនៅតែរក្សាភូមិទាំងពីរដដែល
ប៉ុន្តែយើងត្រូវមានកាតព្វកិច្ចរកតំបន់មួយទៀតក្នុងខេត្តកំពង់ចាម
ដើម្បីប្រគល់ទៅឲ្យវៀតណាមវិញ។ នេះយើងហៅថា ការសម្រុះសម្រួល»។
ទោះជាយ៉ាងណា លោក វ៉ា គឹមហុង មិនបានប្រាប់កាលបរិច្ឆេទពិតប្រាកដ
នៃការដោះដូរភូមិរវាងកម្ពុជា និងវៀតណាមនៅឡើយទេ
ប៉ុន្តែលោកបានបញ្ជាក់ថា ដំណើរការដោះដូរភូមិ
នឹងចាប់ផ្តើមក្នុងឆ្នាំនេះ។
ប៉ុន្តែលោក ស៊ាន ប៉េងសែ
ប្រធានគណៈកម្មាធិការព្រំដែនកម្ពុជានៅប្រទេសបារាំង
បានធ្វើការរិះគន់យ៉ាងខ្លាំង
លើគម្រោងការដោះដូរភូមិរវាងរដ្ឋាភិបាលកម្ពុជា
និងរដ្ឋាភិបាលវៀតណាមនេះ ដោយលោកអះអាងថា ការដោះដូរនេះ
មិនអាចទទួលយកបានទេ ប្រសិនបើដំណើរការ គ្មានការចូលរួមពីប្រជាជន
ព្រោះការដោះដូរនេះ នឹងធ្វើឲ្យកម្ពុជាបាត់បង់ដីទៅវៀតណាម។
លោកបានបញ្ជាក់ថា៖ «ដូចដែលខ្ញុំបានដឹង ផែនទី
ដែលបារាំងបានរក្សាឲ្យយើងប្រើប្រាស់រហូតមកដល់ពេលនេះ
ស្រុកពញាក្រែក ជារបស់ខ្មែរ»។ លោកបានបន្តថា ប្រសិនបើភូមិទាំងពីរ
ក្នុងស្រុកពញាក្រែក ត្រូវបានដាក់ជាដីវៀតណាម
តាំងពីសម័យអាណានិគមបារាំង
ម្ល៉េះសមជនជាតិវៀតណាមនឹងចូលមករស់នៅក្នុងភូមិទាំងនោះពេញ ហើយ
មិនអាចខ្មែរយើងរស់នៅបានទេ។ លោកស៊ាន ប៉េងសែ បន្តថា៖
«បញ្ហាទឹកដី មិនដែលអាចដោះដូរ ដូចជាដោះដូរនំប៉័ង
នឹងផ្លែក្រូចនោះទេ។ យើង
ត្រូវមានការយល់ព្រមពីប្រជាជនទាំងអស់ព្រោះដីនោះមិនមែន
កម្មសិទិ្ធរបស់លោក វ៉ា គឹមហុង និងលោក ហ៊ុន សែនទេ»។
លោក ហេង សំរិន ប្រធានរដ្ឋសភា
មិនអាចទាក់ទងសុំការអត្ថាធិប្បាយបានទេ កាលពីម្សិលមិញ ប៉ុន្តែលោក
ជាម យៀប តំណាងរាស្ត្រពីគណបក្សប្រជាជន បានថ្លែងថា
ភូមិខាងលើជាស្រុកកំណើតរបស់លោក ហេង សំរិន
ដែលគាត់ធ្លាប់រស់នៅតាំងពីកំណើត រហូតដល់គាត់មានអាយុជិត ៨០
ឆ្នាំ។ ប៉ុន្តែលោកបន្តថា មុនពេលលោក ហេង សំរិន កើត
លោកមិនបានដឹងទេថា ទីនោះ ជារបស់កម្ពុជា ឬវៀតណាម។ លោក
លើកឡើងថា៖ «ភូមិរបស់សម្តេចពញាចក្រី
ខ្ញុំធ្លាប់ទៅទីនោះជាញឹកញាប់។ វានៅក្បែរព្រំដែន សម្តេច ហេង
សំរិន បានប្រកាសរួចហើយថា តាំងពីសម្តេចចាប់កំណើត
សម្តេចបានរស់នៅទីនោះ»។ ទោះយ៉ាងណា លោកបានបន្ថែមថា
ការដោះដូរនេះ
ត្រូវមានការសម្រុះសម្រួលឲ្យបានត្រឹមត្រូវរវាងកម្ពុជា និងវៀតណាម
និងថា ប្រសិនបើភូមិលោក ហេង សំរិន ជារបស់វៀតណាម
កម្ពុជាគួរមានកន្លែងផ្សេងទៀតប្រគល់ឲ្យវៀតណាមវិញ។
លោក កឹម សុខា ប្រធានគណបក្សសិទ្ធិមនុស្ស បានថ្លែងថា វៀតណាម
គេបានរៀបចំផែនការកាត់ច្រឹបយកទឹកដីខ្មែរនៅតាមព្រំដែន
តាំងពីក្រោយឆ្នាំ ១៩៧៩ មកម្ល៉េះ គឺមានលោកប៉ែន សុវណ្ណ
ដែលកាលនោះជានាយករដ្ឋមន្ត្រី ជាសាក្សី គឺគាត់បានប្រឆាំងជំទាស់
រហូតដល់មានការទម្លាក់គាត់ចេញពីតំណែង។ លោកកឹម សុខា
បានបញ្ជាក់ថា៖ «ប្រសិនបើរដ្ឋាភិបាលកម្ពុជា ព្រមកាត់ (ភូមិខ្មែរ)
ឲ្យគេ (វៀតណាម) នោះប្រវត្តិសាស្ត្រ
នឹងចារទុក…ជាកំហុសធ្ងន់ណាស់»។
លោក រស់ វ៉ា អាយុ ៧១ ឆ្នាំ និងលោក ជុំ ជិន អាយុ ៧១ ឆ្នាំ
ជាអ្នកភូមិពោធិ៍ព្រឹក ក្នុងស្រុកពញាក្រែកក្បែរភូមិទាំងពីរ
បានអះអាងថា ភូមិថ្លុកត្រាច និងអន្លង់ជ្រៃ ពិតជារបស់កម្ពុជា
ដែលពលរដ្ឋខ្មែររស់នៅជាច្រើនជំនាន់មកហើយនិងថា
ទាហានវៀតណាមធ្លាប់ពួនក្នុងព្រៃក្បែរនោះ
នៅពេលពួកគេប្រយុទ្ធជាមួយនឹងទាហានអាមេរិក។ លោក រស់ វ៉ា
បានបញ្ជាក់ថា៖ «ភូមិទាំងនោះពិតជាដីខ្មែរ។
វាមិនមែនជាការភាន់ច្រឡំទេ»។
លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា
ដែលធ្លាប់ត្រូវបានជាប់ពន្ធនាគារ
ដោយសារការបញ្ចេញមតិលើបញ្ហាការបោះបង្គោលព្រំដែនកម្ពុជា-វៀតណាម
ដោយផ្អែកទៅលើសន្ធិសញ្ញាព្រំដែនបំពេញបន្ថែមដ៏ចម្រូងចម្រាស
បានថ្លែងថា បញ្ហាព្រំដែន ជាបញ្ហាអាយុជីវិតរបស់ជាតិទាំងមូល
ដែលមុននឹងឈានទៅដល់កិច្ចព្រមព្រៀងណាមួយ
គឺត្រូវតែមានការពិភាក្សាហ្មត់ចត់ពីរដ្ឋសភា
និងត្រូវស្វែងរកការឯកភាពជាតិ
មិនមែនត្រូវពឹងផ្អែកតែទៅលើគណៈកម្មាធិការព្រំដែនតែមួយនោះទេ ។
លោកបន្តថា៖«គេ (វ៉ា គឹមហុង) ថា
ភូមិរបស់ លោកហេង សំរិន ជាភូមិរបស់វៀតណាមយូរហើយ
មិនអាចទេ…ខ្ញុំធ្លាប់ចុះទៅផ្ទាល់ជួបចាស់ទុំនៅទីនោះ
គាត់ប្រាប់ខ្ញុំថា កាលពីអំឡុងឆ្នាំ ៦០
ដីខ្មែរទៅពីព្រំដែនបច្ចុប្បន្ន ៣-៤ គីឡូម៉ែត្រទៀត»។
លោកបញ្ជាក់ថា ការកំណត់ព្រំដែន
គេមិនត្រូវពឹងផ្អែកទាំងស្រុងតែទៅលើផែនទីនោះទេ
គឺគេត្រូវតែពិនិត្យមើលពីភូមិសាស្ត្រជាក់ស្តែង
ដែលប្រជាជនក្នុងប្រទេសនីមួយៗរស់នៅតាំងពីដូនតារបស់ពួកគេមក
ផងដែរ៕TK
រាយការណ៍បន្ថែមដោយ សូ វិសាល
No comments:
Post a Comment