2013-03-30
ដោយ ទេព សុរ៉ាវី
RFA
ខណៈការបោះឆ្នោតខិតជិតមកដល់ លោក សម រង្ស៊ី ប្រធានគណបក្ស សម រង្ស៊ី
បានព្យាយាមចងសម្ព័ន្ធភាពជាមួយគណបក្ស សិទ្ធិមនុស្ស
និងបង្កើតគណបក្សថ្មីដែលមានឈ្មោះថា "គណបក្សសង្គ្រោះជាតិ"។
គណបក្សថ្មីនេះត្រូវបានគណបក្សកាន់អំណាចរិះគន់ថា
គ្រាន់តែជាគណបក្សព្យុះក្នុងក្អមប៉ុណ្ណោះ
និងគ្មានឥទ្ធិពលអ្វីទាក់ទាញរកសំឡេងឆ្នោតឲ្យគាំទ្របានទេ។
តើគណបក្សសង្គ្រោះជាតិ ពិតជាគណបក្សព្យុះក្នុងក្អមដូចការលើកឡើងមែនឬទេ?
គណបក្សកាន់អំណាចតែងឡកឡឺយចំពោះគណបក្សប្រឆាំង
ជួនកាលថាជាគណបក្សបញ្ឆោត
ឬជាគណបក្សដែលមិនអាចមានឥទ្ធិពលអ្វីធំដុំ
ប្រៀបដូចជាព្យុះក្នុងក្អមជាដើម។
ក្នុងចំណោមគណបក្សនយោបាយនានាដែលប្រកួតប្រជែងក្នុងការបោះឆ្នោត
កន្លងមកនៅកម្ពុជា គណបក្សសង្គ្រោះជាតិ នៅតែជាគណបក្សប្រឆាំង
និងជាគូប្រជែងលេចធ្លោធំតែមួយគត់ជាមួយគណបក្សកាន់អំណាច។
រីឯគណបក្សហ៊្វុនស៊ិនប៉ិច វិញ
ថ្វីតែធ្លាប់ជាគូប្រជែងសំខាន់ជាមួយគណបក្សប្រជាជន
កាលពីបោះឆ្នោតជាតិសម័យអ៊ុនតាក់ (UNTAC) ក្នុងឆ្នាំ១៩៩៣
នៅពេលនេះលែងជាគណបក្សប្រឆាំងទៀតហើយ។ លោក ហ៊ុន សែន
នាពេលថ្មីៗនេះបានញាក់រួចទៅហើយឲ្យគណបក្សហ៊្វុនស៊ិនប៉ិច
ចូលរដ្ឋាភិបាលចម្រុះម្តងទៀតក្រោយបោះឆ្នោតជាតិនាខែកក្កដា។
តើគណបក្សសង្គ្រោះជាតិដែលទើបតែកកើតនេះ
អាចមានឥទ្ធិពលទាញរកប្រជាប្រិយភាពពីម្ចាស់ឆ្នោតនោះទេ? ការដែលលោក
សម រង្ស៊ី មិនពើងទ្រូងដាក់លោក កឹម សុខា ទៀត
ហើយងាកទៅបន្ទន់ឥរិយាបថព្រមជ្រកដំបូងស្លាកគណបក្សតែមួយវិញ
គឺជាការបង្រួបបង្រួមកម្លាំងមួយដែលមជ្ឈដ្ឋាននានាចាត់ទុកថាជា
កត្តាសំខាន់មួយក្នុងការធ្វើអោយមានតុល្យភាពរវាងគណបក្សកាន់អំណាច
និងគណបក្សប្រឆាំង។
ការចងសម្ព័ន្ធភាពរវាងគណបក្សប្រឆាំងធំពីរនៅពេលនេះ
ទោះចង់មិនចង់ ក៏អាចធ្វើអោយគណបក្សប្រជាជនកម្ពុជា
ដែលកាន់អំណាចយូរជាងគេក្នុងតំបន់អាស៊ី ក៏អាចព្រឺព្រួចខ្លះដែរ។
ការកាត់ទោសលោក សម រង្ស៊ី អោយជាប់ឈ្មោះជាទណ្ឌិត
ដែលឈានទៅដល់ការលុបឈ្មោះលោកចេញពីបញ្ជីឈ្មោះអ្នកបោះឆ្នោតជាដើម
ត្រូវបានគេមើលឃើញថា
គឺជាការបញ្ចៀសឥទ្ធិពលរបស់គណបក្សប្រឆាំងនោះឯង។
ដូចនេះ តើគណបក្សសង្គ្រោះជាតិ ជាគណបក្សព្យុះក្នុងក្អម ឬក្រៅក្អម?
នោះ ចម្លើយអាចនិយាយបានថា ប្រសិនបើសម្ព័ន្ធភាពរវាងគណបក្ស សម
រង្ស៊ី និងគណបក្ស សិទ្ធិមនុស្ស នៅតែមានរហូតដល់ថ្ងៃបោះឆ្នោតនោះ
គណបក្សសង្គ្រោះជាតិ អាចជាគណបក្សព្យុះក្រៅក្អម
និងមានឥទ្ធិពលឲ្យគណបក្សប្រជាជន ជ្រុះកៅអីខ្លះក្នុងរដ្ឋសភាបាន។
គណបក្ស សម រង្ស៊ី និងគណបក្ស សិទ្ធិមនុស្ស
មានហ៊ុនតែរៀងៗគ្នានៅក្នុងដៃ។ គណបក្សទាំងពីរមានអាសនៈចំនួន
២៩រួចទៅហើយក្នុងរដ្ឋសភាសព្វថ្ងៃ ដូច្នេះអាចនិយាយបានថា
គណបក្សសង្គ្រោះជាតិ ក៏អាចមានសំឡេងគាំទ្រ និងអាសនៈចំនួន ២៩ បានដែរ។
នេះមិនគិតពីក្បួនខ្នាតនៃការគណនារកចំនួនអាសនៈផង។
បើគិតរូបមន្តនៃការគណនារកអាសនៈ ឬកៅអីក្នុងរដ្ឋសភាវិញ
គណបក្សប្រជាជន រឹតតែព្រួយថែមទៀត។ ព្រួយត្រង់ថា
នៅពេលដែលគណបក្សប្រឆាំងធំពីររួមគ្នាតែមួយ
និងមានការគាំទ្រច្រើននោះ សំណល់នៃការគណនារកចំនួនអាសនៈ
អាចនឹងទទួលផលច្រើនទៅដល់គណបក្សសង្គ្រោះជាតិ
រហូតធ្វើឲ្យគណបក្សនេះកើនអាសនៈបន្ថែមលើអាសនៈដែលមានស្រាប់។
ជាទូទៅ រូបមន្តនៃការគណនារកចំនួនអាសនៈ ត្រូវមើលឃើញថា
ជារូបមន្តអយុត្តិធម៌សម្រាប់គណបក្សតូចតាច។
សំណល់នៃលទ្ធផលគុណចែកទាំងនោះ ឬនិយាយឲ្យស្រួលស្តាប់
សំឡេងឆ្នោតរបស់គណបក្សឯទៀតដែលមានចំនួនគាំទ្រមិនគ្រប់មួយអាសនៈ
នឹងត្រូវបង្វិលឲ្យទៅគណបក្សដែលមានសំឡេងគាំទ្រច្រើន។ ភាគច្រើន
គណបក្សប្រជាជន
តែងចំណេញពីសំណល់ទាំងនោះរហូតធ្វើឲ្យកើនចំនួនអាសនៈដោយមិនខំ
ប្រឹង។ យ៉ាងហោចណាស់ ការច្របាច់បញ្ចូលគ្នារវាងគណបក្សតូចតាច
ឬគណបក្សប្រឆាំងនៅពេលនេះ អាចប្រមូលសំឡេងគាំទ្ររបស់ម្ចាស់ឆ្នោត
ចេញពីការក្ដោបក្ដាប់របស់គណបក្សកាន់អំណាចបានខ្លះដែរ។
តាមមើលទៅ គណបក្សប្រជាជនកម្ពុជា
អាចនឹងរក្សាសន្លឹកឆ្នោតគាំទ្រដដែល
ប៉ុន្តែអាចនឹងបាត់អាសនៈខ្លះក្នុងរដ្ឋសភាទៅឲ្យគណបក្សសង្គ្រោះ
ជាតិ។
ប្រសិនបើគណបក្សសង្គ្រោះជាតិ
នៅតែបន្តដង្ហើមដល់នាទីចុងក្រោយនៃការបោះឆ្នោត
វាអាចនឹងក្លាយជាព្យុះក្រៅក្អម
និងមានផលចំណេញច្រើនដល់ប្រជាពលរដ្ឋ។
តែវាជះឥទ្ធិពលអាក្រក់ដល់គណបក្សកាន់អំណាច។
គណបក្សកាន់អំណាច
មិនមែនមិនបារម្ភពីរឿងចងសម្ព័ន្ធភាពរបស់គណបក្សប្រឆាំង
ដូចការអះអាងជាញឹកញយនោះទេ។ តែគណបក្សកាន់អំណាច មានភាពឆ្លាតវៃ
និងប្ដូរយុទ្ធសាស្ត្រលឿនរហ័ស ដើម្បីផ្ដួលដៃគូប្រជែងរបស់ខ្លួន។
យុទ្ធសាស្ត្រទាំងនោះដែលគេច្រើនតែធ្វើនៅមុនរដូវបោះឆ្នោតម្តងៗ
រួមមាន ការចុះវាស់វែងដីធ្លីជូនប្រជាពលរដ្ឋ
ប្ដូរយុទ្ធសាស្ត្រពង្រឹងឡូត៍នេសាទ
ការប្ដូរយុទ្ធសាស្ត្រប្រឆាំងអំពើពុករលួយនៅមូលដ្ឋាន
និងប្ដូរយុទ្ធសាស្ត្រផ្សេងៗទៀត
ដែលអាចផ្តល់ផលប្រយោជន៍ដល់ប្រជាពលរដ្ឋជាក់ស្តែងដែលមិនមែនជា
អំណោយ។
ទោះជាយ៉ាងណាក៏ដោយ
មិនមាននរណាអាចទស្សន៍ទាយចរិតរបស់អ្នកនយោបាយបានទេ។
នៅនាទីចុងក្រោយ បើគណបក្សសង្គ្រោះជាតិ ចែកចានចែកឆ្នាំងគ្នានោះ
គណបក្សប្រឆាំងទាំងពីរនេះ អាចនឹងបាត់បង់សំឡេងគាំទ្រ
និងធ្លាក់ប្រជាប្រិយភាពភ្លាមៗ
ហើយអាចនឹងទទួលអាសនៈសភាតិចតួចដូចការបោះឆ្នោតមុនៗដែរ។ នៅពេលនោះ
ពាក្យថាគណបក្សព្យុះក្នុងក្អម ឬគណបក្សបញ្ឆោត
អាចគេនិយាយត្រូវតែម្តង៕
No comments:
Post a Comment