ដោយ សេង មូលីនី និង នួន បូរិន
VOD
លោក សម រង្ស៊ី ប្រធានគណបក្សសង្គ្រោះជាតិ អំពាវនាវដល់សហគមន៍អន្តរជាតិ ត្រូវជួយប្រទេសកម្ពុជាឲ្យរៀបចំការបោះឆ្នោត នៅថ្ងៃទី២៨ ខែកក្កដា ឆ្នាំ២០១៣ បានប្រព្រឹត្តិទៅដោយលក្ខណៈប្រជាធិបតេយ្យ និងតម្លាភាព។
តាមសេចក្ដីថ្លែងការរបស់ លោក សម រង្ស៊ី ដែលមានចំណងជើងថា សហគមន៍អន្តរជាតិមិនត្រូវទទួលស្គាល់រដ្ឋាភិបាល មិនស្របច្បាប់ ប៉ុន្តែបានទទូចឲ្យជួយរៀបចំការបោះឆ្នោត ប្រព្រឹត្តទៅដោយលក្ខណៈប្រជាធិបតេយ្យ។ លោកបានថ្លែងថា ការរកឃើញរបស់អង្គការឃ្លាំមើលការបោះឆ្នោត របស់អាមេរិក NDI ការបោះឆ្នោតនៅថ្ងៃទី២៨ ខែកក្កដា ឆ្នាំ២០១៣ នឹងមិនប្រព្រឹត្តទៅដោយតម្លាភាព ប្រជាធិបតេយ្យអ្វីឡើយ។ លោកបានបញ្ជាក់ថា ការរកឃើញរបស់វិទ្យាសា្ថនជាតិប្រជាធិតេយ្យ NDI បង្ហាញនូវភាពមិនប្រក្រតីនូវបញ្ជីបច្ចុប្បន្នភាព ឈ្មោះនិងតួលេខអ្នកបោះឆ្នោត គឺជាផ្នែកមួយដែល ស្ថាប័ន រៀបចំការបោះឆ្នោតនៅកម្ពុជា គ.ជ.ប កំពុងរៀបចំឲ្យគណបក្សកាន់អំណាច ឈ្នះឆ្នោត តាមរយៈសន្លឹកឆ្នោត ដែលស្ថិតក្នុងស្ថានភាព មិនប្រក្រតី ។
វិទ្យាសា្ថនជាតិប្រជាធិតេយ្យ NDI កាលពីសប្ដាហ៍មុន បានផ្សព្វផ្សាយរបាយការណ៍សង្ខេបនៃសវនកម្មបញ្ជីឈ្មោះ អ្នកបោះឆ្នោត ចុះថ្ងៃទី២១ ខែមីនានេះ ដោយបានរកឃើញថា ១០.៨% នៃអ្នកបោះឆ្នោតដែលជឿថា ខ្លួនបានចុះឈ្មោះ តែមិនអាចរកឃើញនូវឈ្មោះរបស់ខ្លួននៅក្នុងបញ្ជី។ ជាមួយគ្នានេះ អ្នកមានឈ្មោះបោះឆ្នោតមានត្រឹមតែ ៦៣.៦% ប៉ុណ្ណោះដែលរស់នៅទីកន្លែងពួកគេបានចុះឈ្មោះ ខណៈ១៧.៩% នៃអ្នកឆ្លើយតបរកឃើញ ប៉ុន្តែភាគច្រើនរស់នៅកន្លែងផ្សេង និង ១០.៤%គឺ មិនអាចរកឃើញ។
ស្តាប់សំឡេង៖ click here
លោកសម រង្ស៊ី បានដាក់ជាចំណោទថា ប្រសិនគិតតាមតួលេខនេះ គឺគណបក្សប្រជាជនកម្ពុជា អាចនឹងបានសំឡេង ៦៣% ដែលតួលេខនេះ គឺ ២០% ជាលេខមិនប្រក្រតី ហើយការពិតគណបក្សប្រជាជនអាចបានតែ ៤៣%ប៉ុណ្ណោះ ខណៈគណបក្សសង្គ្រោះជាតិ អាចដណ្ដើមបានសំឡេង ៥១% ។
ឆ្លើយតបនឹងការចោទខាងលើរបស់ លោក សម រង្ស៊ី លោក ទេព នីថា អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប បានហៅលោក សម រង្ស៊ី ថាជាអ្នកនយោបាយចាំតែប្រឆាំង ហើយថាការចោទនេះមិនមានមូលដ្ឋាន ជាក់លាក់អ្វីឡើយ ៖ "ការពិតទៅមិនមែនទើបតែលើកហ្នឹងទេ វាច្រើនដងហើយ ហើយគាត់និយាយតែអញ្ចឹង ទោះបី NDI មិនចេញរបាយការណ៍ ក៏គាត់ថាអញ្ចឹងដែរ អញ្ចឹងទេខ្ញុំគិតថា នេះជារឿងអ្នកនយោបាយទេ ហើយ គ.ជ.ប គ្រាន់តែជាស្ថាប័នមួយ ដែលត្រូវបង្កើតឡើង ហើយអនុវត្តទៅតាមច្បាប់តែប៉ុណ្ណឹង"។
ប៉ុន្តែ លោក គល់ បញ្ញា នាយកប្រតិបត្តិអង្គការឃ្លាំមើលការបោះឆ្នោត នៅកម្ពុជា ហៅថា Comfrel ក៏បានចោទ គ.ជ.ប ថាជា ស្ថាប័នដែលចេះតែធ្វើការជាមួយគណបក្សកាន់អំណាច ៖ "សមាភាព គ.ជ.ប កន្លងមកហ្នឹងវាអត់តម្លាភាព គេអត់ទាន់បាន គណបក្សនានាគេអត់បានមកមើលការជ្រើសរើសហ្នឹង ថាតើគេទុកចិត្តអត់សមត្ថភាពកន្លងមកនេះ គឺថាការធ្វើហ្នឹងដោយស្ងាត់ៗ អញ្ចឹងទៅ ដល់ពេលចូលទៅសភាអនុម័ត ហើយអញ្ចឹងគណបក្សដែលមិនមែនជាគណបក្សប្រជាជនហ្នឹង ដែលជាគណបក្សដែលមកប្រកួតប្រជែងហ្នឹង គេតែងតែបង្ហាញពីការមិនទុកទៅលើការងាររបស់ គ.ជ.ប ហ្នឹង គណបក្សសមរង្ស៊ី យើងបានជួបគណបក្សជាច្រើន គាត់តែងតែលើកពីបញ្ហាហ្នឹង ដោយសារតែការជ្រើសរើស វាអត់តម្លាភាព"។
បើទោះជាយ៉ាងនេះក្ដី លោក ទេព នីថា អះអាងថា គ.ជ.ប នឹងខិតខំរៀបចំការបោះឆ្នោតឲ្យប្រព្រឹត្តិទៅមានតម្លាភាព និងប្រជាធិបតេយ្យ គឺប្រយោជន៍ដើម្បីឲ្យសហគមន៍អន្តរជាតិ និងគណបក្សនយោបាយទាំងអស់ ទទួលស្គាល់លទ្ធផលចេញការបោះឆ្នោតថ្ងៃទី២៨ ខែកក្កដា ឆ្នាំ២០១៣ ខាងមុខនេះ៕
No comments:
Post a Comment