សមត្ថកិច្ចរារាំងស្ត្រីបឹងកក់
ចេញពីភូមិដើម្បីហែក្បួនប្រារព្ធទិវាសិទ្ធិនារីអន្តរជាតិ ៨ មីនា
និងដាក់ញត្តិនៅក្រសួងកិច្ចការនារី នៅព្រឹកថ្ងៃសៅរ៍ ទី៨ ខែមីនា
ឆ្នាំ២០១៤។ (RFA/Sek Bandith)
ដោយ សេក បណ្ឌិត
2014-03-08
RFA
កម្លាំងសមត្ថកិច្ចប្រមាណ ២០០នាក់ ប្រដាប់ដោយខែល និងដំបងឆក់
បានរាយបណ្ដាក់គ្នាជារបង បិទផ្លូវចេញចូលតំបន់បឹងកក់
ដើម្បីរារាំងមិនឲ្យក្រុមស្ត្រីភូមិនេះហែក្បួនប្រារព្ធសិទ្ធិ
នារីអន្តរជាតិចេញពីតំបន់នោះ។
ភាគីទាំងពីរបានប្រឈមមុខដាក់គ្នានៅត្រង់ចំណុចច្រកចេញពី
តំបន់បឹងកក់ ជាប់សណ្ឋាគារភ្នំពេញ កែងផ្លូវព្រះមុនីវង្ស
ចាប់តាំងពីម៉ោងប្រមាណ ៨ព្រឹក ថ្ងៃសៅរ៍ ទី៨ មីនា
ប៉ុន្តែមិនបង្កឲ្យមានអំពើហិង្សាវាយតប់គ្នានោះទេ។
ក្រុមស្ត្រីបឹងកក់
រួមមានព្រះសង្ឃនិមន្តចូលរួមជាច្រើនអង្គដែលត្រូវសមត្ថកិច្ច
អាជ្ញាធររារាំងនោះ ក្រៅពីហែក្បួនប្រារព្ធសិទ្ធិនារី
ក៏មានបំណងនាំគ្នាយកញត្តិទៅដាក់នៅក្រសួងកិច្ចការនារីផងដែរ។
ខ្លឹមសារនៃញត្តិនោះ
គឺសុំឲ្យរដ្ឋមន្ត្រីក្រសួងនេះជួយអន្តរាគមន៍ទៅស្ថាប័នតុលាការ
លើករណីចាប់ខ្លួនសកម្មជនការពារសិទ្ធិដីធ្លី លោក ចាន់ ពុទ្ធិស័ក្ត
និងអ្នកទាំង ២០នាក់ផ្សេងទៀត ដែលកំពុងជាប់ឃុំ
ដោយសុំឲ្យតុលាការបើកសវនាការឲ្យបានឆាប់បំផុត
ដើម្បីផ្តល់យុត្តិធម៌ដោះលែងអ្នកទាំង ២១នាក់នោះ ដោយឥតលក្ខខណ្ឌ។
ក្រុមស្ត្រីបឹងកក់
បាននាំគ្នាច្រៀងរាំនៅចំពោះមុខរបាំងកម្លាំងសមត្ថកិច្ចនោះ
និងបន្តទាមទារសុំឲ្យបើកផ្លូវធ្វើចរាចរធម្មតា។
រហូតដល់ម៉ោងជិត ១១ព្រឹកថ្ងៃដដែល អ្នកបឹងកក់
បានត្រឡប់ទៅភូមិវិញ ដើម្បីប្រារព្ធទិវាសិទ្ធិនារីអន្តរជាតិ
ចំណែកឯក្រុមសមត្ថកិច្ច ក៏បានដកកម្លាំងទៅវិញដែរ។
សូមរង់ចាំអាន និងស្ដាប់ព័ត៌មានបន្ថែម...
No comments:
Post a Comment