ដោយ៖ ជន ស្រីណុច និង អ៊ឹង ប៊ុនថន
VOD
សកម្មជនម្នាក់នៃគណបក្សសង្គ្រោះជាតិ
នៅសង្កាត់សួង ក្រុងសួង ខេត្តកំពង់ចាម បានអះអាងថា
ខ្លួនត្រូវបានមន្ត្រីគណបក្សប្រជាជនកម្ពុជា
ព្រមានសម្លាប់ដោយសារការប្រមូលស្នាមមេដៃពីប្រជាពលរដ្ឋដើម្បី
ដាក់ជូនអង្គការសហប្រជាជាតិតវ៉ារឿងមិនប្រក្រតីនៃការបោះឆ្នោត ។
សកម្មជនគណបក្សសង្គ្រោះជាតិ លោក ទិន
ស្រេន ប្រាប់VOD នៅព្រឹកថ្ងៃទី១៥ ខែតុលានេះថា
កាលពីយប់មិញមានពលរដ្ឋម្នាក់បានខ្សឹបប្រាប់គាត់ថា
អនុប្រធានភូមិ ពណ្ណរាយ ឈ្មោះ ហ៊ៃ សារឹម បានបោះសម្តីថា
ក្រោយពីរៀបចំរចនាសម្ព័ន្ធបក្សរួចរាល់អស់ហើយ
ខ្លួននឹងកម្ចាត់រូបលោកចោល ៖ "ប្រាប់ថា
គេរៀបរចនាសម្ព័ន្ធបក្សគេហើយ គណបក្សប្រជាជនហ្នឹងណា
គេត្រូវដកសកម្មជនគណបក្សសង្គ្រោះជាតិយកទៅសម្លាប់ចោលហើយ
ខ្ញុំវាធម្មតា ប៉ុន្តែគ្រួសារគេខ្លាច
ខ្លាចដូចថាយើងដេកយប់ប្រលប់ ឬដើរយប់ប្រលប់អីអញ្ចឹងគេខ្លាច
គាត់ប្រាប់តែប៉ុណ្ណឹង ដល់គេទៅក្រៅគាត់លែងហ៊ានប្រាប់ខ្ញុំទៅ
ដល់ពេលគេមកអើតតាមម៉ោងខ្ញុំប្រាប់ គាត់លែងហ៊ាននិយាយទៅ"។
VOD មិនអាចទាក់ទង អនុប្រធានភូមិពណ្ណរាយ លោក ហ៊ៃ សារឹម ដែលរងការចោទថា ព្រមានសម្លាប់សកម្មជនគណបក្សសង្គ្រោះជាតិ នោះបានទេ។
មន្ត្រីសម្របសម្រួលនៃសមាគមអាដហុក
ប្រចាំខេត្តកំពង់ចាម លោក នាង សូវ៉ាត មានប្រសាសន៍ថា
លោកមិនទាន់ដឹងពីករណីនេះទេ។ តែបើតាមលោកដឹងកន្លងមក
មន្ត្រីគណបក្សប្រជាជនកម្ពុជា
តែងប្រើអំណាចគំរាមសកម្មជនគណបក្សសង្គ្រោះជាតិ
ពេលប្រមូលស្នាមមេដៃពីពលរដ្ឋ។ លោក នាង សូវ៉ាត
ស្នើឲ្យក្រសួងមហាផ្ទៃបកស្រាយពីមូលហេតុនៃការហាមឃាត់ប្រមូលស្នាម
មេដៃពីពលរដ្ឋ ដែលក្រសួងអះអាងថា ប៉ះពាល់សន្តិសុខសង្គមនោះ ៖
"អញ្ចឹងបានខ្ញុំសំណូមពរថា កុំឲ្យក្រសួងមហាផ្ទៃក្តី
ខាងណាមួយក្តី គាត់ផ្សាយឲ្យច្បាស់មក ដែលហៅថា
ប៉ះពាល់សុវត្ថិភាពសន្តិសង្គមហ្នឹង វាយ៉ាងម៉េច
ព្រោះអីការផ្តិចមេដៃ វាប៉ះពាល់យ៉ាងម៉េចបាន វាអត់ប៉ះពាល់អី
វាមិនអាចជារឿងអាសន្នដល់ស្រុកទេសអីទេ នេះជាការប្រជាមតិ
ការធ្វើប្រជាមតិមួយ នៅក្នុងសង្គមប្រជាធិបតេយ្យគេប្រើអាហ្នឹងឯង
គេប្រើមេដៃជាម្ចាស់ឆ្នោតហ្នឹងឯង"។
រដ្ឋមន្ត្រីក្រសួងមហាផ្ទៃ លោក ស ខេង
មានប្រសាសន៍ថា ការដែលក្រសួងមហាផ្ទៃចេញប្រកាសហាម
ដើរផ្តិតស្នាមមេដៃតាមផ្ទះប្រជាជននោះ
ដោយសារតែព្រួយបារម្ភពីសុវត្ថិភាពផ្ទាល់ខ្លួនរបស់ប្រជាពលរដ្ឋ
ព្រោះវាមានលក្ខណៈបើកចំហរពេក ៖ "វាទាក់ទងត្រង់ថា
កាលណាយើងបោះឆ្នោត យើងបោះឆ្នោតសម្ងាត់ យល់ទេ ច្បាប់បោះឆ្នោត
គេឲ្យបោះឆ្នោតសម្ងាត់ គូសនៅក្នុងបន្ទប់ម្នាក់ឯង
ហើយដល់ផ្តិតមេដៃយើងទៅផ្តិតចំហសាធារណៈ
ដល់អញ្ចឹងវាធ្វើឲ្យដូចបែងចែកប្រជាជនអញ្ចឹងណា
អ្នកផ្តិតនិងអ្នកមិនផ្តិតហ្នឹងមើលមុខគ្នាវាមិនចំ
អានេះបញ្ហាយើងបារម្ភអញ្ចឹងទេ ហើយគណបក្សសង្គ្រោះចោទថា
ស្អីបិទសិទ្ធិសេរីភាពអីណាហូរហែ បិទសិទ្ធិពលរដ្ឋ មិនមែនទេ
បើថាគេមិនឲ្យផ្តិតថា ប៉ុន្តែនេះគេឲ្យផ្តិតនៅទីស្នាក់ការទៅ"។
កាលពីថ្ងៃចន្ទម្សិលមិញនេះ
អាជ្ញាធរមូលដ្ឋានក្នុងខេត្ត បន្ទាយមានជ័យ
បានដកហូតយកឯកសារស្នាមមេដៃប្រជាពលរដ្ឋពីសកម្មជនគណបក្សសង្គ្រោះ
ជាតិ
និងហាមឃាត់មិនឲ្យបន្តសកម្មភាពប្រមូលស្នាមមេដៃពីប្រជាពលរដ្ឋ
ទៀតទេ។
ការប្រមូលស្នាមមេដៃដោយគណបក្សសង្គ្រោះ
ជាតិនេះ ដើម្បីធ្វើញត្តិដាក់ទៅអង្គការសហប្រជាជាតិ
នៅថ្ងៃទី២៣ខែតុលា ជាខួបនៃកិច្ចព្រមព្រៀងសន្តិភាពក្រុងប៉ារីស
ឲ្យជួយរកយុត្តិធម៌ទាក់ទិនទៅនឹងភាពមិនប្រក្រតីនៃលទ្ធផលបោះឆ្នោត
កាលពីថ្ងៃទី២៨ ខែកក្កដា ឆ្នាំ២០១៣៕
No comments:
Post a Comment