ដោយ ហ៊ុំចំរើន
RFA
ក្រុមគ្រួសារជនរងគ្រោះជាសកម្មជនគណបក្សសង្គ្រោះជាតិ
នៅស្រុកព្រះស្ដេច ខេត្តព្រៃវែង បានរៀបរាប់ចំពោះករណីនេះ ឲ្យដឹងថា
អាជ្ញាធរមូលដ្ឋានរើសអើងមិនចង់ដោះស្រាយ ក្រោយពីដឹងថា
ជនរងគ្រោះមាននិន្នាការនយោបាយគាំទ្រគណបក្សប្រឆាំង។
លោក គាត រ៉ា រស់នៅភូមិសំពោង ឃុំបន្ទាយចក្រី ស្រុកព្រះស្ដេច
ជាកូនរបស់ជនរងគ្រោះឈ្មោះ ចាប ណាន មានប្រសាសន៍នៅថ្ងៃទី៦ តុលា ថា
ឪពុករបស់ខ្លួនត្រូវបានជនអ្នកគាំទ្រគណបក្សកាន់អំណាច
នៅភូមិក្បែរគ្នា វាយដំក្នុងរឿងទំនាស់ព្រំប្រទល់ដី
បណ្ដាលឲ្យរបួសធ្ងន់ធ្ងររហូតដល់ដេកពេទ្យ។ លោកថា
ករណីនេះនៅពេលសាច់ញាតិទៅប្ដឹងរកខុសត្រូវនៅអាជ្ញាធរមូលដ្ឋាន
ដើម្បីឲ្យជួយចាប់ជនបង្កដាក់ទោសតាមផ្លូវច្បាប់
ប៉ុន្តែនីតិវិធីរបស់អាជ្ញាធរហាក់មានការយឺតយ៉ាវពុំទទួលបានលទ្ធផល
ចំពោះការដោះស្រាយបញ្ហានេះឡើយ។
លោក គាត រ៉ា៖ «ឈ្លោះគ្នាអារឿងដីហ្នឹង
ដល់ហើយគេចូលវាយឪខ្ញុំនៅផ្ទះ ដល់គេអូសយកទៅវាយផ្ទះគេថែមទៀត
វាយឪខ្ញុំឡើងសន្លប់បាត់មាត់ឈឹងហើយហ្នឹង។ គេកាប់
៣ពូថៅចំក្បាលបង! ដល់ហើយអ៊ីចឹងទៅ
គេថាឪខ្ញុំចូលទៅវាយគេដល់ផ្ទះ។
ហើយដល់ពេលខ្ញុំទៅអាជ្ញាធរអីអ៊ីចឹងទៅ
គេថាឪខ្ញុំហ្នឹងគេមិនរកខុសត្រូវឲ្យទេ
គេថាឪខ្ញុំហ្នឹងសកម្មជនគណបក្សសង្គ្រោះជាតិ អ៊ីចឹង។
រឿងហ្នឹងតែប៉ុណ្ណឹងទេបង! ដល់ឥឡូវ គេអត់រកខុសត្រូវឲ្យ
គេថាយើងហ្នឹងសកម្មជនគណបក្សសង្គ្រោះជាតិ គេមិនរកឲ្យទេ
មេប៉ូលិសនៅស្រុកព្រះស្ដេច ហ្នឹងបាទ។
យ៉ាងម៉េចគេមិនរកខុសត្រូវឲ្យ គេធ្វើព្រងើយៗ
វាទៅអាជនជាប់ចោទហ្នឹងវាដោះ
វាចាប់បានហើយលែងចោលវិញអស់រលីងទៅបង»។
ជនរងគ្រោះឈ្មោះ លោក ចាប ណាន វ័យ ៤០ឆ្នាំ
ជាសកម្មជនគណបក្សសង្គ្រោះជាតិ រស់នៅភូមិសំពោង ឃុំបន្ទាយចក្រី។
ជនរងគ្រោះបានមានទំនាស់ជាមួយគូភាគីអ្នកគាំទ្រគណបក្សកាន់អំណាច
ឈ្មោះ លោក សន រីន រស់នៅភូមិជាមួយជនរងគ្រោះ។ គូភាគីទាំង២
បានឈ្លោះប្រកែកគ្នាក្នុងទំនាស់របងព្រំប្រទល់ដីក្នុងភូមិក្បែរ
គ្នា កាលពីនៅរសៀលថ្ងៃទី៤ តុលា។
សាច់ញាតិជនរងគ្រោះថ្លែងថា កាលណោះ
សកម្មជនគណបក្សប្រឆាំងមកពីចាក់គ្រឿងឧបករណ៍បំពងសំឡេងតាមផ្ទះ
ប្រជាពលរដ្ឋ នៅភូមិក្បែរគ្នា លុះមកដល់កន្លែងកើតហេតុ
អ្នកទាំង២បានបោះពាក្យសម្ដីទៅវិញទៅមក។ មួយសន្ទុះក្រោយមក
ជម្លោះរបស់អ្នកទាំង២ឈានដល់ការប្រើអំពើហិង្សា។
កូនរបស់ជនរងគ្រោះអះអាងថា ក្នុងគ្រានោះ ជនបង្កមានគ្នាច្រើន
ខ្លះមានព្រនង់ឈើ និងកាំបិតពូថៅវាយសំពងឪពុករបស់ខ្លួន
បណ្ដាលឲ្យរងបួសធ្ងន់ដួលសន្លប់នៅនឹងកន្លែងតែម្ដង។ លោកថា
ក្រោយពេលកើតហេតុ បានទៅប្ដឹងអាជ្ញាធរមានសមត្ថកិច្ច
តែពុំមានអាជ្ញាធរណាពន្លឿនជួយដោះស្រាយរកខុសត្រូវ
ចំពោះបញ្ហានេះឡើយ។
ហេតុដែលអាជ្ញាធរមិនបានយកចិត្តទុកដាក់ក្នុងរឿងនេះ
ព្រោះសមត្ថកិច្ចដឹងថា ជនរងគ្រោះជាអ្នកគាំទ្រគណបក្សប្រឆាំង។
ឆ្លើយតបនឹងការចោទប្រកាន់នេះ
ប្រធានប៉ុស្តិ៍នគរបាលឃុំបន្ទាយចក្រី លោក អ៊ី ហ៊ាត
បានច្រានចោលចំពោះការចោទប្រកាន់របស់សាច់ញាតិជនរងគ្រោះនេះ៖ «ពី
មិនដោះម៉េច បើគាត់ទៅទាំងអស់គ្នាអត់មានមនុស្សនៅផ្ទះ
ទៅធ្វើការសួរបំភ្លឺហ្នឹង រកមនុស្សមិនបាន បើគាត់ទៅអស់ហ្នឹង។
សមត្ថកិច្ចខ្ញុំបានប្រាប់ទូន្មានទាំងអស់ គាត់មកដល់ហ្នឹង
យើងសិក្សានៅក្នុងច្បាប់ហ្នឹង ធ្វើម៉េចភស្តុតាងវាមិនគ្រប់គ្រាន់
សំអាងលើឯកសារថាមិនបានឃាត់
ដោយសារអីដែលគ្មានមុខសញ្ញាណាមួយដែលត្រូវឃាត់។
ដល់ពេលអត់មានមុខសញ្ញាណាមួយដែលចង្អុលឃាត់
អត់មានឯកសារអីត្រូវការឃុំត្រូវការអីទេ។ អ៊ីចឹង
ឯកសាររបស់តុលាការបានមានសិទ្ធិឃុំខ្លួន»។
លោកថា ក្នុងជម្លោះនេះ អ្នកទាំងពីរបានវាយតដៃគ្នាទាំងសងខាង
ហើយអាជ្ញាធរកំពុងធ្វើការស៊ើបអង្កេតចំពោះករណីនេះនៅឡើយ។
សាច់ញាតិរបស់ជនរងគ្រោះ បានឲ្យដឹងថា កន្លងមក
ជនបង្កធ្លាប់បានប្រើពាក្យសម្ដីគំរាមសម្លាប់ជនរងគ្រោះច្រើនលើក
រួចមកហើយដែរ។ ប៉ុន្តែពុំបានសម្រេចដោយសារឱកាសមិនអំណោយផល។
ជនរងគ្រោះរងរបួសជាទម្ងន់
ត្រូវបានសាច់ញាតិបញ្ជូនទៅសម្រាកព្យាបាលនៅមន្ទីរពេទ្យកាល់ម៉ែត្រ
ក្រុងភ្នំពេញ ទាំងយប់ នៅថ្ងៃកើតហេតុ។ រហូតមកដល់ពេលនេះ
អ្នកជំងឺនៅពុំទាន់មានអាការៈធូរស្រាលនៅឡើយ។
ក្រុមគ្រួសាររបស់ជនរងគ្រោះ ស្នើឲ្យអាជ្ញាធរមានសមត្ថកិច្ច
តាមចាប់ជនបង្កបញ្ហាយកមកដោះស្រាយតាមផ្លូវច្បាប់ឲ្យបានឆាប់
ដើម្បីជៀសវាងកុំឲ្យអ្នកបង្កបញ្ហាបានចិត្ត
និងហ៊ានប្រព្រឹត្តទៅលើសកម្មជនគណបក្សសង្គ្រោះជាតិ ដទៃទៀត៕
No comments:
Post a Comment