ដោយ ដែន អយុធ្យា
2011-07-30
មេដឹកនាំគណបក្សសិទ្ធិមនុស្សបានថ្លែងថា មានតែគណបក្សសិទ្ធិមនុស្សមួយប៉ុណ្ណោះដែលមានកម្លាំងប្រកួត ប្រជែងតទល់ជាមួយគណបក្សប្រជាជនកម្ពុជា ដើម្បីឈានដល់ការផ្លាស់ប្ដូររបបដឹកនាំតាមបែបផ្ដាច់ការនៅកម្ពុជា ឆ្ពោះទៅរកការដឹកនាំតាមបែបប្រជាធិបតេយ្យ និងមានការគោរពសិទ្ធិមនុស្ស។
៣០-កក្កដា-២០១១៖ ប្រធានគណបក្សសិទ្ធិមនុស្ស លោក កឹម សុខា ថ្លែងនៅក្នុងការបើកសន្និបាតក្រុមប្រឹក្សាជាតិលើកទី២ នៅទីស្នាក់ការគណបក្ស នារាជធានីភ្នំពេញ។
ថ្លែងនៅក្នុងសន្និបាតក្រុមប្រឹក្សាជាតិលើកទី២ នៅព្រឹកថ្ងៃទី៣០ ខែកក្កដា ឆ្នាំ២០១១ លោក កឹម សុខា ប្រធានគណបក្សសិទ្ធិមនុស្ស បានប្រកាសនៅចំពោះមុខសកម្មជនគាំទ្ររាប់រយនាក់ក្នុងពិធីជួបជុំ នាទីស្នាក់ការកណ្ដាល បក្សសិទ្ធិមនុស្សប្រចាំទីក្រុងភ្នំពេញ ថា គណបក្សនេះនឹងទទួលបានជ័យជម្នះពីការបោះឆ្នោតឃុំសង្កាត់ និងសកលនាឆ្នាំ២០១២ និង ឆ្នាំ២០១៣ ខាងមុខ។
លោក កឹម សុខា បានអះអាងថា សព្វថ្ងៃគណបក្សខ្លួនមានពលរដ្ឋច្រើនលើសលប់នៅទូទាំង ២៤ខេត្តក្រុងនៅទូទាំងប្រទេសកម្ពុជា បានគាំទ្រចាប់ពីថ្នាក់មូលដ្ឋានរហូតដល់ដល់ថ្នាក់ជាតិក្នុងនោះ ក៏មានសកម្មជនគណបក្ស សម រង្ស៊ី, ហ្វ៊ុនស៊ិនប៉ិច, នរោត្តម រណឫទ្ធិ និងបក្សប្រជាជនកម្ពុជា មកចូលរួមផងដែរ។
លោក កឹម សុខា បានឲ្យដឹងពីផែនការនយោបាយរបស់បក្សខ្លួនសម្រាប់អនុវត្តរយៈពេល ២ឆ្នាំខាងមុខក្រោមចំណងជើងថា "ដំណើរឆ្ពោះទៅមូលដ្ឋានដើម្បីសិទ្ធិមនុស្ស និងការផ្លាស់ប្ដូរ" ដើម្បីឈ្នះរាល់គ្រប់អាណត្តិបោះឆ្នោតដូច្នេះ ៖ «គណបក្សកាន់អំណាច សព្វថ្ងៃនេះមានបញ្ហាច្រើនណាស់ ជាពិសេសទំនាស់ដីធ្លីក្នុងមូលដ្ឋានបញ្ហាពុករលួយបញ្ហាទំនិញឡើងថ្លៃ បញ្ហាការគំរាមកំហែងគណបក្សកាន់អំណាចដោះស្រាយមិនបានទេ ហើយបញ្ហាប្រជាពលរដ្ឋព្រួយបារម្ភពីអន្តោប្រវេសន៍ខុសច្បាប់ហ្នឹងជា ការមួយដែលយើងមានសង្ឃឹម។ ម្យ៉ាងទៀតដោយសារឃើញគណបក្សដទៃ ដូចជាគណបក្ស សម រង្ស៊ី គណបក្ស នរោត្តម រណឫទ្ធិ ជាដើម គឺមានការបែកបាក់គ្នាខ្លាំងណាស់។ អ៊ីចឹងហើយក្ដីសង្ឃឹមនេះ គឺយើងនឹងប្រមូលយកខ្មែរអ្នកស្នេហាជាតិទាំងអស់ ដែលធ្លាប់បោះឆ្នោតឲ្យគណបក្ស សម រង្ស៊ី គណបក្សហ៊ុនស៊ិនប៉ិច និង រណឫទ្ធិ ដែលអស់សង្ឃឹមជាមួយគេហ្នឹងមកជុំគ្នាជាមួយគណបក្សសិទ្ធិមនុស្ស វិញ»។
ជ័យជម្នះដែលលោក កឹម សុខា មានជំនឿឈ្នះការបោះឆ្នោតឃុំ-សង្កាត់ និងសកលនាឆ្នាំ២០១២ និង ២០១៣ ខាងមុខ ដោយលោកយល់ឃើញថា រដ្ឋាភិបាលដឹកនាំប្រទេសសព្វថ្ងៃមិនអាចដោះស្រាយបញ្ហាជាតិសំខាន់ៗ ដូចជាបញ្ហាបូរណភាពទឹកដី, បទល្មើសព្រៃឈើទំនាស់ដីធ្លី និងអំពើពុករលួយជាដើម។
មិនមែនតែបក្សសិទ្ធិមនុស្សទេ បានអះអាងពីការឈ្នះឆ្នោត ចំណែកថ្នាក់ដឹកនាំគណបក្ស សម រង្ស៊ី ក៏បានលើកឡើងដូចគ្នានេះដែរ។ លោក យឹម សុវណ្ណ មន្ត្រីនាំពាក្យគណបក្ស សម រង្ស៊ី បានថ្លែងថា គណបក្សខ្លួននឹងមានជំនឿលើការបោះឆ្នោតជ្រើសរើសក្រុមប្រឹក្សាឃុំ សង្កាត់ នាឆ្នាំ២០១២ និងបោះឆ្នោតសកលឆ្នាំ២០១៣ ខាងមុខ ប្រសិនបើស្ថាប័នគណៈកម្មាធិការជាតិរៀបចំបោះឆ្នោត ហៅកាត់ គ.ជ.ប. មានភាពឯករាជ្យ និងមិនគាំទ្រគណបក្សប្រជាជនកម្ពុជា កំពុងកាន់អំណាចទេនោះ។
លោក យឹម សុវណ្ណ បន្ថែម ៖ «ប្រាកដជាឈ្នះ ព្រោះកន្លងមកហ្នឹងមានការលំបាក ប៉ុន្តែគណបក្ស សម រង្ស៊ី នៅកើនសំឡេងពីអាណត្តិមួយទៅអាណត្តិមួយ ក៏ប៉ុន្តែបើមានការបោះឆ្នោតដោយសេរី និងយុត្តិធម៌ ហើយយើងអាចនឹងទទួលបានឱកាសក្នុងការផ្សព្វផ្សាយសារនយោបាយរបស់យើង តាមប្រព័ន្ធផ្សព្វផ្សាយរបស់ជាតិ ដែលសព្វថ្ងៃនេះគ្រប់គ្រងដោយគណបក្សកាន់អំណាចដោយគ្មានការ គំរាមកំហែង គ្មានការទិញសន្លឹកឆ្នោត ហើយ គ.ជ.ប. គឺពិតជាស្ថាប័នជាតិពិតប្រាកដមិនបម្រើឲ្យគណបក្សប្រជាជននោះ យើងនឹងទទួលបានជ័យជម្នះ»។
ទោះយ៉ាងណា មន្ត្រីសង្គមស៊ីវិលមួយចំនួននៅកម្ពុជា បានថ្លែងថា គណបក្សសិទ្ធិមនុស្ស និងគណបក្ស សម រង្ស៊ី នឹងមិនទទួលបានជោគជ័យក្នុងការបោះឆ្នោតឃុំសង្កាត់ និងសកលនាឆ្នាំ២០១២ និង ២០១៣ ខាងមុខនោះទេ បើបក្សទាំងពីរមិនធ្វើការបង្រួបបង្រួមគ្នាទេនោះ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ មានប្រសាសន៍ដោយគ្មានជំនឿថា បក្សសិទ្ធិមនុស្ស និងបក្ស សម រង្ស៊ី អាចយកជ័យជម្នះលើបក្សប្រជាជនកម្ពុជា ក្នុងអាណត្តិបោះឆ្នោតឃុំសង្កាត់ ឬសកលបានទេ បើបក្សប្រជាធិបតេយ្យទាំងពីរមិនរួបរួមគ្នា ហើយបន្តហែកហួរគ្នាទៀតនោះ។
លោក រ៉ុង ឈុន បន្ថែម ៖ «ការឆ្ពោះទៅកាន់អំណាចបានទាល់តែមានការ ប្រមូលផ្ដុំគ្នា ហើយបើនៅបែកគ្នាអ៊ីចឹងមិនអាចឆ្ពោះទៅធ្វើការកាន់អំណាចបានទេ ហើយគោលការណ៍ដែលឆ្ពោះទៅកាន់អំណាច ទៅកាន់ការផ្លាស់ប្ដូរដែលអាចជួយសង្គមបាន អ្នកនៅក្រៅរដ្ឋាភិបាលហ្នឹងត្រូវធ្វើម៉េចត្រូវប្រមូលផ្ដុំគ្នា ហើយបើមិនប្រមូលផ្ដុំគ្នាទេ យើងមើលឃើញថា គោលនយោបាយរបស់ខ្លួន ដែលគណបក្សបានដាក់ចេញល្អៗហ្នឹង មិនអាចអនុវត្តគោលនយោបាយហ្នឹងបានទេ បើសិនជាមិនបានកាន់អំណាចនោះ»។
លោក ជាម យៀប មន្ត្រីជាន់ខ្ពស់គណបក្សប្រជាជនកម្ពុជា បានអះអាងថា គណបក្សប្រជាជននឹងបន្តឈ្នះឆ្នោតនៅគ្រប់អាណត្តិ ព្រោះគណបក្សនេះមានគោលនយោបាយច្បាស់លាស់ និងយល់ដឹងពីសុខទុក្ខពលរដ្ឋ ព្រមទាំងបានដឹកនាំប្រទេសឈានទៅរកការអភិវឌ្ឍលើគ្រប់វិស័យពី ១អាណត្តិទៅ ១អាណត្តិ។
បន្ថែមលើសនេះ លោកនាយករដ្ឋមន្ត្រី ហ៊ុន សែន ធ្លាប់បានអះអាងថា គណបក្សប្រជាជនកម្ពុជា នឹងបន្តឈ្នះឆ្នោត ហើយរូបលោកនឹងនៅបន្តដឹកនាំប្រទេស ព្រោះមានការគាំទ្រទាំងក្នុងជួរបក្ស និងមានការគាំទ្រពីម្ចាស់ឆ្នោតនៅទូទាំងប្រទេសកម្ពុជា ទៀតនោះ។
លោក ហ៊ុន សែន ឲ្យដឹងដូច្នេះ ៖ «ជោគជ័យរបស់គណបក្សប្រជាជនមានតម្លៃណាស់ ដោយសារពួកអ្នកឯងជេរ បើពួកអ្នកឯងមិនជេរមិនសូវមានតម្លៃទេ លទ្ធផលដែលបានមកងាយពេក»។
ទោះយ៉ាងនេះក្ដី លោក កឹម សុខា បានថ្លែងថា មានតែគណបក្សសិទ្ធិមនុស្សតែ ១គត់នៅកម្ពុជា ដែលអាចប្រជែងជាមួយគណបក្សប្រជាជនកម្ពុជា ដើម្បីឲ្យមានការផ្លាស់ប្ដូរនៅក្នុងការបោះឆ្នោតនាពេលខាងមុខឈាន ដល់ការដឹកនាំប្រទេសតាមបែបប្រជាធិបតេយ្យ និងមានការគោរពសិទ្ធិមនុស្ស។
លោក កឹម សុខា បន្ថែម ៖ «គណបក្សសិទ្ធិមនុស្សយល់ឃើញថា គ្រឹះនៃលទ្ធិប្រជាធិបតេយ្យចាក់គ្រឹះនៅមូលដ្ឋាន ដូច្នេះហើយសូមប្រមូលផ្ដុំអារម្មណ៍ទាំងអស់ត្រូវគិតគូរពីមូលដ្ឋាន ហើយផ្ដើមដំបូងដើម្បីអី? គឺដើម្បីធ្វើម៉េចឲ្យប្រជាពលរដ្ឋខ្មែរមានសិទ្ធិចូលរួមការបោះ ឆ្នោត ដូចជាអាចទៅចុះឈ្មោះបានទៅបោះឆ្នោតបានដោយសេរី។ ព្រោះកន្លងមកយើងឃើញថា ប្រជាពលរដ្ឋមួយចំនួន គឺពិបាកធ្វើអត្តសញ្ញាណប័ណ្ណហើយបាត់ឈ្មោះច្រើនណាស់។ អ៊ីចឹងហើយធ្វើម៉េចឲ្យប្រជាពលរដ្ឋមានសិទ្ធិក្នុងការសម្រេចការ បោះឆ្នោត»។
No comments:
Post a Comment