លោក ឈុត វុទ្ធី ត្រូវប៉េអឹមបាញ់សម្លាប់ក្នុងរថយន្ត នៅខេត្តកោះកុង កាលពីថ្ងៃទី ២៦ មេសា ឆ្នាំ ២០១២។ (Provided photo)
ក្រុមគ្រួសារសកម្មជនការពារព្រៃឈើ លោក ឈុត វុទ្ធី
ដែលត្រូវបានឆ្មាំក្រុមហ៊ុនសម្បទានព្រៃឈើបាញ់សម្លាប់
នៅពេលលោកកំពុងស៊ើបអង្កេតការកាប់ឈើខុសច្បាប់នៅខេត្តកោះកុង
កាលពីថ្ងៃទី២៦ ខែមេសា ឆ្នាំ២០១២
បានទាមទារឲ្យរដ្ឋាភិបាលបន្តស្វែងរកឃាតកពិតមកផ្ដន្ទាទោសតាមផ្លូវ
ច្បាប់។
ការអំពាវនាវនេះ ធ្វើឡើងនៅពេលដែលក្រុមគ្រួសារលោក ឈុត វុទ្ធី
គ្រោងរៀបចំពិធីបុណ្យខួបមួយឆ្នាំនៃការស្លាប់របស់លោក ឈុត វុទ្ធី។
លោក ឆើយ ឧត្តមរស្មី កូនប្រុសសកម្មជនដីធ្លីលោក ឈុត វុទ្ធី
មានប្រសាសន៍ថា
តុលាការនៅមិនទាន់ផ្តល់យុត្តិធម៌ឲ្យក្រុមគ្រួសាររបស់លោកនៅឡើយ
ទេ៖ «បាទ! វាដូចជាអត់មានភាពយុត្តិធម៌សោះ ព្រោះឥឡូវហ្នឹង
ឃាតកហ្នឹងមិនដឹងជាត្រូវជានរណាគេ
អីចឹងខ្ញុំចង់សំណូមពរទៅខាងរដ្ឋាភិបាលហ្នឹងបើកសំណុំរឿងហ្នឹង
សាឡើងវិញអីចឹងណាស់ ធ្វើអីចឹងអត់កើតទេ
ព្រោះថាក្នុងនាមគាត់ជាសកម្មជនការពារព្រៃឈើមួយស្លាប់គ្មានន័យ
គ្មានអីចឹង»។
លោកបន្តថា បុណ្យខួប ១ឆ្នាំនោះ នឹងធ្វើឡើងនៅទីកន្លែងដែលលោក
ឈុត វុទ្ធី ត្រូវបានបាញ់សម្លាប់។ លោក ឆើយ ឧត្តមរស្មី បន្តថា
បច្ចុប្បន្នលោកបានក្លាយជាប្រធានអង្គការការពារធនធានធម្មជាតិ
ដើម្បីបន្តការងាររបស់ឪពុកលោក។
ប៉ុន្តែលោកកំពុងជួបប្រទះបញ្ហាថវិកាសម្រាប់ដំណើរការអង្គការនេះ។
លោកសំណូមពរឲ្យសហគមន៍ជាតិ និងអន្តរជាតិ
ផ្តល់ថវិកាជួយដល់អង្គការរបស់លោក
ដើម្បីជួយទប់ស្កាត់ការកាប់បំផ្លាញព្រៃឈើនៅកម្ពុជា៕
No comments:
Post a Comment