សង្គមស៊ីវិលខកចិត្តចំពោះគោលនយោបាយថ្នាក់ជាតិដែលមិនដាក់បញ្ចូលសិទ្ធិទទួលបានព័ត៌មាន​

ថ្ងៃសុក្រ ទី27 ខែកញ្ញា ឆ្នាំ2013
ដោយ៖​ ជន ស្រីណុច និង អ៊ឹង ប៊ុនថន
VOD

សង្គមស៊ីវិលខកចិត្ត ខណៈដែលរដ្ឋាភិបាលកម្ពុជាអាណត្តិទី៥នេះ មានការកែទម្រង់ច្រើននៅក្នុងវិស័យផ្សេងៗ ប៉ុន្តែនៅក្នុងគោលនយោបាយ ថ្នាក់​ជាតិ​រួម​នោះ គេមិនឃើញមានដាក់ចេញពីការបង្កើតឲ្យមានច្បាប់ស្តីពីសិទ្ធិទទួលបានព័ត៌មាននោះទេ។

អ្នកសម្របសម្រួលបណ្តាញរួបរួម ដើម្បីគណនេយ្យភាពសង្គមអាស៊ីបូព៌ា និងប៉ាស៊ីហ្វិក លោក សន ជ័យ មានប្រសាសន៍ នៅព្រឹកថ្ងៃសុក្រនេះថា បើ​ទោះបីជារាជរដ្ឋាភិបាលថ្មី អះអាងថា មានការកែទម្រង់ច្រើនដាក់ក្នុងគោលនយោបាយជាតិ ដែលមានកម្រាស់ប្រមាណជា៥០ទំព័រក៏ដោយ តែ​ច្បាប់​ស្តីពីសិទ្ធិទទួលបានព័ត៌មាន មិនឃើញមានដាក់ទេ។ លោកបញ្ជាក់ថា ច្បាប់នេះជាគោលនយោបាយសំខាន់ ក្នុងការតាម​ដានសកម្មភាព​អភិវឌ្ឍន៍​ប្រ​ទេស​ជាតិ។ លោកបន្តថា ប្រសិនបើសិទ្ធិទទួលបានព័ត៌មានមិនត្រូវបានបើកចំហរទេ នោះការអភិវឌ្ឍន៍សង្គមក៏មិនអាចរីកចម្រើនដែរ ៖

ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យ៉ង គឹមអេង យល់ថា ច្បាប់ស្តីពីសិទ្ធិទទួលបានព័ត៌មានជាកញ្ចក់​ឆ្លុះសកម្មភាព​ នៅក្នុងវិស័យផ្សេងៗ ដែលរដ្ឋាភិបាលអះអាងថានឹងធ្វើការកែប្រែ។ លោកបន្តថា ប្រសិនបើសិទ្ធិទទួលបានព័ត៌មាន​នៅតែមិនត្រូវបានបើកចំហរនោះវិ​ ស័យផ្សេងៗក៏មិនងាយនឹងរីកចម្រើនដែរ ៖

កាលពីថ្ងៃទី១២ ខែកញ្ញានេះ មជ្ឈមណ្ឌលសិទ្ធិមនុស្សកម្ពុជា(CCHR) បានដាក់អនុសាសន៍ទៅរដ្ឋាភិបាលកម្ពុជាអាណត្តិថ្មី ក្នុងការបង្កើតប្រព័ន្ធ​ផ្សព្វ​ផ្សាយ​​ជាតិឯករាជ្យមួយ ដើម្បីធានាថាពលរដ្ឋទទួល បានព័ត៌មានពិតប្រាកដ និងធានាការបោះឆ្នោតប្រព្រឹត្តទៅដោយសេរី និងយុត្តិធម៌។

ក្នុងការបើកកិច្ចប្រជុំគណៈរដ្ឋមន្រ្តីលើកដំបូង នៅសប្តាហ៍នេះ លោកនាយករដ្ឋមន្រ្តី ហ៊ុន សែន ថ្លែងថា ព័ត៌មានប្រៀបដូច​ជាអាហារមួយប្រភេទ​ដែល​មិន​អាច​ខ្វះបាននោះឡើយ៕

សូមសរសេរមកកាន់ កញ្ញា ជន ស្រីណុច តាមរយៈ chornsreynoch@vodhotnews.com