ថ្នាក់ដឹកនាំគណបក្សសង្គ្រោះជាតិ ធ្វើសន្និសីទនៅថ្ងៃទី២០កញ្ញា (រូបថត តាំង វីដា)
ដោយ៖ ដួង សុខា
VOD
គណបក្សប្រឆាំង កាលពីថ្ងៃទី១៩ ខែកញ្ញា
បានប្រកាសពីជំហររបស់ខ្លួនថា
នឹងមិនចូលរួមសម័យប្រជុំលើកដំបូងនៃរដ្ឋសភា នីតិកាលទី៥
ដែលប្រព្រឹត្តទៅនៅថ្ងៃទី២៣ ខែកញ្ញា
តាមព្រះរាជសារអញ្ជើញរបស់ព្រះមហាក្សត្រទ្បើយ
ដរាបណាភាពមិនប្រក្រតីនៃការបោះឆ្នោត មិនត្រូវបានដោះស្រាយ
ដើម្បីផ្តល់យុត្តិធម៌ជូនម្ចាស់ឆ្នោត។
គណបក្សសង្គ្រោះជាតិ បង្ហាញជំហរបែបនេះ
បន្ទាប់ពីកិច្ចចរចាទ្វេភាគី កាលពីថ្ងៃទី១៦ និងទី១៧ ខែកញ្ញា
រវាងថ្នាក់ដឹកនាំកំពូលគណបក្សប្រជាជនកម្ពុជារបស់លោកនាយករដ្ឋមន្ត្រី
ហ៊ុន សែន និងគណបក្សសង្គ្រោះជាតិ នៅវិមានរដ្ឋសភា
មិនអាចដោះស្រាយបញ្ហាបោះឆ្នោត ឲ្យបានជាក់លាក់ ។
គណបក្សទាំងពីរ ដែលឈ្នះអាសនៈរដ្ឋសភា
បានព្រមព្រៀងគ្នា ធ្វើកំណែទម្រង់ស្ថាប័នជាតិ
មានដូចជាគណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប
ប៉ុន្តែមិនបានបង្ហាញអ្វីជាក់លាក់ជាលាយលក្ខណ៍អក្សរចំពោះកំណែទម្រង់
គ.ជ.ប។ ម្យ៉ាងទៀត
ការទាមទាររបស់គណបក្សសង្គ្រោះជាតិឲ្យបង្កើតគណៈកម្មការឯករាជ្យមួយ
ស៊ើបអង្កេតពីភាពមិនប្រក្រតីនៃការបោះឆ្នោត ថ្ងៃទី២៨ ខែកក្កដា
ឆ្នាំ២០១៣ ត្រូវបានគណបក្សកាន់អំណាចច្រានចោល ដោយខ្លួន
គិតថាការទាមទារនេះហួសពីក្របខណ្ឌច្បាប់ហើយ។ ការបង្ហាញជំហរបែបនេះ
ក៏ធ្វើទ្បើង បន្ទាប់ពីព្រះមហាក្សត្រ សម្តេចព្រះបរមនាថ នរោត្តម សីហមុនី
បដិសេធសំណើរបស់តំណាងរាស្ត្រជាប់ឆ្នោតទាំង៥៥រូប
របស់គណបក្សសង្គ្រោះជាតិដែលទូលថ្វាយព្រះអង្គឲ្យលើកពេល
បើកសម័យប្រជុំដំបូងនៃរដ្ឋសភា។
នាយកប្រតិបត្តិគណៈកម្មាធិការ
អព្យាក្រឹត និងយុត្តិធម៌ ដើម្បីការបោះឆ្នោតដោយសេរី
និងត្រឹមត្រូវនៅកម្ពុជា ហៅកាត់ និកហ្វិច (Nicfec) លោក ហង្ស ពុទ្ធា
វិភាគថា ជំហររបស់គណបក្សសង្គ្រោះជាតិ
គឺគោរពតាមឆន្ទៈពលរដ្ឋជិត៣លាននាក់ ដែលបានបោះឆ្នោតឲ្យគណបក្សនេះ
ដែលចង់បានយុត្តិធម៌ ចំពោះភាពមិនប្រក្រតីនៃការបោះឆ្នោត ៖ “
គណបក្សសង្គ្រោះជាតិ កំពុងរុញបញ្ហានេះ
ឲ្យមិនប៉ះទៅព្រះមហាក្សត្រទេ
ប៉ុន្តែអាចរុញប្រជារាស្ត្រទៅប៉ះនឹងព្រះមហាក្សត្រវិញ
បើគាត់មិនចូល គណបក្សសង្គ្រោះជាតិ គាត់ទទួលបានផលប្រយោជន៍
ទីមួយគឺអ្នកគាំទ្ររបស់គាត់នៅតែបន្តការគាំទ្រ
ហើយអាចមានអ្នកគាំទ្របន្ថែមទៀត
ហើយផលប្រយោជន៍មួយទៀតគឺគាត់នៅរក្សាបាននូវអ្វីដែលជាកិត្តិយស
និងសេចក្តីថ្លែងការណ៍ នូវពាក្យសម្តីរបស់គាត់ ដែលបានចែងរួចហើយ
នៅមុនពេលឃោសនា និងពេលក្រោយទទួលបានសន្លឹកឆ្នោត”។
លោកគិតថា ចាប់ពីពេលនេះ
រហូតដល់ថ្ងៃប្រជុំរដ្ឋសភាលើកដំបូង ប្រសិនបើគណបក្សសង្គ្រោះជាតិ
មិនផ្លាស់ប្តូរជំហររបស់ខ្លួន គណបក្សមានតែបន្តធ្វើមហាបាតុកម្មទៀត
ដើម្បីទាមទារឲ្យមានតម្លាភាពចំពោះបញ្ហាបោះឆ្នោត។ ដោយទ្បែក
ពាក់ព័ន្ធនឹងគណបក្សកាន់អំណាចដែលប្រកាសចូលប្រជុំរដ្ឋសភាតែឯងនោះ
លោក ហង្ស ពុទ្ធា យល់ថា
គណបក្សនេះនឹងទទួលរងការចោទប្រកាន់ថាមិនគិតពីបញ្ហាប្រទេសជាតិ
ដោយគិតតែប្រយោជន៍ខ្លួនឯង ហើយអាចធ្វើឲ្យព្រះមហាក្សត្រ
បាត់បង់និមិត្តរូបនៃឯកភាពជាតិ និងនិរន្តរភាពជាតិ។ ម្យ៉ាងទៀត
សហគមន៍អន្តរជាតិ នឹងចាត់ទុក រដ្ឋាភិបាលដែលត្រូវបង្កើតទ្បើង
ថាជារដ្ឋាភិបាលមិនស្របច្បាប់ ៖ “សហគមន៍អន្តរជាតិគេមើលមកថា
រដ្ឋាភិបាលកម្ពុជាដែលកើតមកនេះ គឺជារដ្ឋាភិបាល
ពុំស្របតាមច្បាប់ពេញលេញទេ
អញ្ជឹងទំនាក់ទំនងជាមួយសហគមន៍អន្តរជាតិ គេមិនគោរព
គេមិនយកចិត្តទុកដាក់ជាមួយរដ្ឋាភិបាលកម្ពុជា ហើយវិនិយោទុនបរទេស
ហើយក៏អាចមិនយកចិត្តទុកដាក់និងរដ្ឋាភិបាល ក្នុងការបន្ថែមទុន
ឬក៏ដាក់ទុននៅកម្ពុជាដែរ”។
ទោះយ៉ាងណា លោកអំពាវនាវឲ្យអ្នកនយោបាយ កុំយកពលរដ្ឋធ្វើជាឧបករណ៍នយោបាយរបស់ខ្លួន។
សម្រាប់អ្នកវិភាគនយោបាយ លោក សុខ ទូច
ជំហររបស់គណបក្សសង្គ្រោះជាតិពហិការចូលប្រជុំរដ្ឋសភា បង្ហាញថា
ឯកភាពជាតិមិនទាន់មាននោះទេ។ លោក អះអាងថា
ការប្រជុំតែឯកបក្សក៏ផ្ទុយនឹងមាត្រា៧៦នៃរដ្ឋធម្មនុញ្ញ ដែលចែងថា
រដ្ឋសភាមានសមាជិកជាតំណាងរាស្ត្រយ៉ាងតិច ១២០រូប។
ការប្រជុំរដ្ឋសភាតែឯកបក្សក៏ផ្ទុយនឹងមាត្រា៥១ថ្មីនៃ
រដ្ឋធម្មនុញ្ញ ដែលចែងថា
ព្រះរាជាណាចក្រកម្ពុជាអនុវត្តនយោបាយប្រជាធិបតេយ្យ សេរីពុហបក្ស។
លោកក៏យល់ឃើញថា ព្រះមហាក្សត្រកំពុងទទួលសម្ពាធនយោបាយ
ខណៈគណបក្សប្រឆាំងពហិការចូលប្រជុំ៖ “មកដល់ចំណុចនេះ
គឺសម្ពាធនយោបាយ សម្រាប់ព្រះអង្គធ្ងន់
ដែលធ្វើឲ្យព្រះអង្គលំបាកព្រះទ័យ ក្នុងការសម្រេចចិត្ត
ថាតើនៅពេលដែលគណបក្សសង្គ្រោះជាតិ បដិសេធមិនចូលរួមប្រជុំ មានន័យថា
មិនឯកភាពជាតិរួចទៅហើយ។ ការប្រជុំលើកដំបូងនៅក្នុងសភា
ហើយបើមានផ្ទុះបាតុកម្មបង្ហូរឈាមណាមួយ កើតមានឡើង
នោះហើយជាការចូលរួមចំណែកមួយដែរ។ ម៉េចបានចូលរួមចំណែក?
ព្រោះជាតិមិនទាន់ឯកភាពផង ម៉េចឲ្យអ្នកនយោបាយ ដោះស្រាយទៅ”។
លោកបន្តថា ព្រះមហាក្សត្រ
គួរទុកឲ្យអ្នកនយោបាយបន្តដោះស្រាយបញ្ហាជាតិឲ្យចប់សិន
ដើម្បីឲ្យមានឯកភាពជាតិ មុននឹងព្រះអង្គយាងជាព្រះរាជាធិបតីភាព
ក្នុងការបើកសម័យប្រជុំរដ្ឋសភាលើកដំបូង។
ចំណែក អ្នកវិភាគនយោបាយ លោកស្រី ជា
វណ្ណាត យល់ថា ពហិការរបស់គណបក្សសង្គ្រោះជាតិ
នឹងប៉ះទង្គិចជាមួយស្ថាប័នព្រះមហាក្សត្រ និងពលរដ្ឋមួយចំនួន
ក្នុងចំណោមពលរដ្ឋជិត៣លាននាក់ ដែលបានបោះឆ្នោតឲ្យគណបក្សប្រឆាំង
ប៉ុន្តែគោរពព្រះមហាក្សត្រ ៖ "គណបក្សសង្គ្រោះជាតិលោកប្រកែកថា
លោកមិនចូលរួមទេ ដូចជាលោកប្រកែកជាមួយព្រះមហាក្សត្រ
ថាលោកមិនស្តាប់ព្រះមហាក្សត្រទេ របៀបអញ្ចឹង
ហើយនេះខ្ញុំយល់ឃើញថា កាលណាមានជំហរអញ្ចឹង
ជំហរហ្នឹងអាចប៉ះពាល់ដល់ប្រជាពលរដ្ឋ
ដែលគាំទ្រគណបក្សសង្គ្រោះជាតិដែរ
ក៏ប៉ុន្តែសុទ្ធតែជាអ្នកគោរពបូជាព្រះមហាក្សត្រ"។
លោកស្រីគិតថា ការព្រួយបារម្ភថា
គណបក្សសង្គ្រោះជាតិអាចចាញ់ល្បិចគណបក្សប្រជាជនកម្ពុជា
នៅពេលអនាគតដូចគណបក្សហ៊្វុនស៊ិនប៉ិច
ប្រសិនបើគណបក្សនេះចូលប្រជុំនោះ គឺមិនអាចកើតមានទេ
ពីព្រោះគណបក្សប្រឆាំងធ្លាប់ឆ្លងកាត់ បទពិសោធន៍នយោបាយច្រើនហើយ ៖
"ទស្សនៈរបស់ខ្ញុំ ខ្ញុំថាគួរតែអញ្ជើញទៅ ចំណេញជាងមិនចូល
ហើយកុំឲ្យភ័យថា ខ្លាចចាញ់បោក ខ្លាចចាញ់កល ខ្លាចចាញ់ល្បិច
ខ្ញុំថាមិនគួរទេ ពីព្រោះប្រជាពលរដ្ឋទេ លោកជាអ្នកសម្រេច
ប្រជាពលរដ្ឋទេ ដែលលោកតាមមើលអ្នកនយោបាយ"។
ទោះយ៉ាងណា
ថ្នាក់ដឹកនាំកំពូលរបស់គណបក្សសង្គ្រោះជាតិ បានប្រកាសថា
ពហិការរបស់ខ្លួន គឺស្របទៅតាមឆន្ទៈរបស់ពលរដ្ឋ
ដែលជាម្ចាស់ឆ្នោតទៅវិញទេ ដែលចង់ឲ្យមានយុត្តិធម៌
នៅក្នុងការបោះឆ្នោត។ ហេតុដូចនេះហើយ
ទើបគណបក្សទូលថ្វាយព្រះមហាក្សត្រឲ្យលើកពេលកោះប្រជុំរដ្ឋសភា៕
សូមសរសេរមកកាន់លោក ដួង សុខា តាមរយៈ duong_sokha@vodhotnews.com
No comments:
Post a Comment